შსს-მ ადმინისტრაციული წარმოება დაიწყო მძღოლის მიმართ, რომლის მანქანასაც 2 თებერვალს „თბილისი მოლთან“ სამართალდამცველები მიცვივდნენ და ხელებს ურტყამდნენ.
მანქანაში გიორგი მონავარდსაშვილი და თათუშა არველაძე ისხდნენ.
თათუშა არველაძემ სოციალურ ქსელში გაავრცელა ვიდეო, რომლიდანაც ირკვევა, რომ შსს-მ გიორგი მონავარდისაშვილი ადმინისტრაციულ სამართალდარღვევათა კოდექსის 123-ე მუხლის მე-4 ნაწილის დარღვევისთვის დააჯარიმა. ეს მუხლი მანქანის გაჩერების შესახებ პოლიციის მოთხოვნის შეუსრულებლობას გულისხმობს.
აღნიშნული 1500-ლარიან ჯარიმას და მართვის უფლების 1 წლით შეჩერებას ითვალისწინებს.
მონავარდისაშვილს ადმინისტრაციული სამართალწარმოების ოქმი შეუდგინეს ამავე კოდექსის 173-ე მუხლის (მე-2 ნაწილის) დარღვევაზე, ეს მუხლი პოლიციის შეურაცხყოფას გულისხმობს. საქმე სასამართლომ უნდა განიხილოს.
2 თებერვალს გიორგი მონავარდისაშვილმა თქვა, რომ „მოლთან“ შეკრებილ ხალხს სიგნალით სოლიდარობას უცხადებდა, რის გამოც ნიღბიანი პოლიციელები მას აგინებდნენ და ემუქრებოდნენ.
მონავარდისაშვილი ამბობს, რომ საპასუხოდ თვითონ ეუბნებოდა, „რასაც მე მეუბნები, ორი იმდენი შენთქო“.
ის იხსენებს, რომ უცებ მანქანას ნიღბიანი პირები მისცვივდნენ და დაუწყეს ხელების რტყმა, გინება და მუქარა. მონავარდისაშვილმა ტერიტორიის დატოვება შეძლო.
