შსს-ში „პუბლიკას“ დაუდასტურეს, ინფორმაცია რომ გურამიშვილზე პოლიციის თანამშრომელმა ძაღლს ესროლა.
დაშავებული ძაღლი ვეტერინარულ კლინიკაში გადაიყვანეს.
შსს-ში აცხადებენ, რომ შინაგან საქმეთა სამინისტროს თანამშრომელი, მის მცირეწლოვან შვილებთან ერთად გადაადგილდებოდა გურამიშვილის გამზირზე, რა დროსაც ძაღლმა აგრესია გამოხატა მისი 6 წლის შვილის მიმართ.
„პოლიციის მაიორი შეეცადა, რომ მოეგერიებინა ძაღლი, რის გამოც იძულებული გახდა აუცილებელი მოგერიების ფარგლებში სამსახურებრივი იარაღიდან განეხორციელებინა გასროლა. ძაღლი გადაყვანილია ვეტერინარულ კლინიკაში. ფაქტთან დაკავშირებით შედგა შესაბამისი რეაგირების ოქმი და მიმდინარეობს მოკვლევა”, – აცხადებენ შსს-ში.
ინფორმაცია თავდაპირველად სოციალურ ქსელში გავრცელდა, ჯგუფ ცხოველთა უფლებების კომიტეტში მოქალაქე წერდა, რომ თვითმხილველების თქმით, ძაღლმა ბავშვს დაუყეფა, რის შედეგადაც, შსს-ს თანამშრომელმა მას იარაღიდან ესროლა.
