სილიკონის ველზე მცხოვრები ქართველები: უნიკალური მომენტია, გავთავისუფლდეთ რუსეთის გავლენისგან

01 ივნისი, 2024

პუბლიკა 10:49, 01 ივნისი, 2024

01 ივნისი, 2024

კალიფორნიის სილიკონის ველზე მცხოვრები ქართველები პარლამენტს მოუწოდებენ, გაიწვიოს რუსული კანონი და გაითვალისწინოს საქართველოს სტრატეგიული პარტნიორების შენიშვნები საქართველოს სწრაფი ინტეგრაციისთვის ევროატლანიკურ ოჯახში, ისე, როგორც გაწერილია საქართველოს კონსტიტუციის 78-ე მუხლში.

განცხადებაში ნათქვამია, რომ ეს არის საქართველოს ისტორიაში უნიკალური მომენტი, როცა საქართველოს შეუძლია გათავისუფლდეს რუსეთის გავლენისგან და შეუერთდეს დასავლური ტიპის დემოკრატიაზე დამყარებული ქვეყნების დიდ ოჯახს. ხელმომწერები აცხადებენ, რომ „ასეთი შესაძლებლობის დაკარგვას მომავალი თაობები არ გვაპატიებენ”.

განცხადებას ხელს სილიკონის ველზე მცხოვრები 130 ქართველი აწერს.

განცხადებას უცვლელად გთავაზობთ:

„კალიფორნიის სილიკონის ველზე მცხოვრები ქართველები მუდმივად ვცდილობთ არ დავკარგოთ კავშირი საქართველოსთან, ჩავერთოთ საგანმანათლებლო თუ ტექნოლოგიურ პროექტებში, დავეხმაროთ ჩვენს თანამემამულეებს უკეთესი სახელმწიფოს შენებაში. ჩვენთვის ძალიან მნიშვნელოვანია საქართველოს დასავლური ტრაექტორია და მიუღებელია ნებისმიერი ქმედება, რომელიც საქართველოს გადაახვევინებს ევრო-ატლანტიკური გზიდან და გაგვაწყვეტინებს კავშირს მსოფლიოს ტექნოლოგიურ და აკადემიურ ცენტრებთან.

ჯერ კიდევ 2023 წლის მარტში, ჩვენ შეშფოთებით ვაკვირდებოდით საქართველოში ე.წ. „უცხოური გავლენების გამჭვირვალობის“ საკანონმდებლო ინიციატივასთან დაკავშირებულ მოვლენებს. ათიათასობით მოქალაქე, უპირატესად ახალგაზრდობა, მშვიდობიანად , მაგრამ კატეგორიულად აპროტესტებდა ამ კანონპროექტს.

პროტესტის მამოძრავებელი მუხტი იყო საქართველოს მოსახლეობის კონსტიტუციურად დეკლარირებული სწრაფვა გააგრძელოს სავალდებულო რეფორმები, რომლებიც დაგვირგვინდება საქართველოს ინტეგრაციით ევროკავშირსა და ჩრდილოეთ ატლანტიკის ხელშეკრულების ორგანიზაციაში.

ჩვენთვის სასიხარულო გახდა, რომ 2023 წლის პროტესტების საპასუხოდ საპარლამენტო უმრავლესობამ გადახედა საკუთარ პოზიციას, გაითვალისწინა ხალხის ნება და გაიწვია კანონპროექტი. ამავდროულად, საპარლამენტო უმრავლესობის მხრიდან გაჟღერდა დაპირება, რომ ეს კანონპროექტი დღის წესრიგში აღარ დადგებოდა.

ზემოხსენებულიდან გამომდინარე, სავსებით გამართლებულია ქართველი ხალხის აღშფოთება და მასიური პროტესტი აღნიშნული კანონის დღის წესრიგში კვლავ შემოტანის გამო. მეტიც, 2024 წლის ვერსია შარშანდელთან შედარებით „გამკაცრებულია“ და ვრცელდება არა მარტო იურიდიულ, არამედ კერძო პირებზეც.

სამართლის ექსპერტები ერთხმად აცხადებენ, რომ აღნიშნული კანონი ემყარება რუსეთის ფედერაციაში 2012 წელს მიღებულ ანალოგიურ კანონს. ცნობილია, რომ რუსეთის ფედერაციაში ამ კანონის მიღებით და შემდგომი გამკაცრებით კიდევ უფრო გაძლიერდა პუტინის ავტოკრატიული რეჟიმი.

ამ პოზიციას იზიარებენ ევროპარლამენტარები და აშშ სახელმწიფო დეპარტამენტის წარმომადგენლები, რომლებიც ერთხმად აღნიშნავენ, რომ ე.წ. “უცხოური გავლენის“ შესახებ კანონი ემსახურება კრიტიკული ხმების ჩახშობას და მიზნად ისახავს საქართველოს მრავალფეროვანი სამოქალაქო საზოგადოების შევიწროებას.

დამოუკიდებლობის მოპოვების შემდეგ, საქართველოს მოსახლეობამ არაერთხელ განაცხადა, რომ მისი არჩევანი არის დასავლური ტიპის დემოკრატიული საზოგადოებად ჩამოყალიბება. ამ ურთულეს გზაზე ჩვენი მეგობარი ქვეყნების და სტრატეგიული პარტნიორების ურყევი მხარდაჭერით საქართველოს ახალგაზრდა დემოკრატიამ მნიშვნელოვან წარმატებებს მიაღწია, რაც საბოლოოდ აისახა საქართველოსთვის ევროკავშირის კანდიდატი ქვეყნის სტატუსის მინიჭებაში. ჩვენთვის უკიდურესად შემაშფოთებელია, აშშ-სა და ევროკავშირის ლიდერების განცხადებები ზემოაღნიშნული კანონის მიერ საქართველოს დასავლური ტრაექტორიის რისკის ქვეშ დაყენებისა და მისი სამომავლო „ბელორუსიზაციის” შესახებ.

უაღრესად მნიშვნელოვანია, რომ საქართველოში ამჟამად მიმდინარე მასიური სამოქალაქო პროტესტის ფონზე, 2024 წლის 15 მაისს, კონგრესმენ ჯო ვილსონის მიერ ინიცირებულ იქნა კანონპროექტი „MEGOBARI“, რომელიც მოუწოდებს საქართველოს საკანონმდებლო ორგანოს გაიწვიოს მიღებული კანონი, შეწყვიტოს ანტიდემოკრატიული ქმედებები და საპასუხოდ გვთავაზობს საქართველოსთვის სავაჭრო და სამხედრო დახმარების პაკეტს და ვიზალიბერალიზაციის შესაძლებლობას.

ეს არის საქართველოს ისტორიაში უნიკალური მომენტი, როცა შეგვიძლია გავთავისუფლდეთ რუსეთის გავლენისგან და შევუერთდეთ დასავლური ტიპის დემოკრატიაზე დამყარებული ქვეყნების დიდ ოჯახს. ასეთი შესაძლებლობის დაკარგვას მომავალი თაობები არ გვაპატიებენ.

Მოგიწოდებთ, შეწყდეს მშვიდობიანი მომიტინგეების მიმართ ძალადობა და განსხვავებული აზრის გამო მოქალაქეების დაშინება და დევნა.

აქვე მოვუწოდებთ საქართველოს პარლამენტს, სასწრაფოდ გაიწვიოს კანონპროექტი და გაითვალისწინოს საქართველოს სტრატეგიული პარტნიორების შენიშვნები საქართველოს სწრაფი ინტეგრაციისთვის ევროატლანიკურ ოჯახში, ისე, როგორც გაწერილია საქართველოს კონსტიტუციის 78-ე მუხლში”, – ნათქვამია განცხადებაში.