საქართველოს საპატრიარქოს საზოგადოებასთან ურთიერთობის სამსახური ავრცელებს განცხადებას, თუ როგორ შეიძლება „ბიბლიური თავისუფლების“ ყოფილი წევრები დაუბრუნდნენ მართმადიდებლურ ეკლესიას.
მათი თქმით, „ბიბლიური თავისუფლების“ ყოფილი წევრები, რომლებსაც სურთ დაბრუნება მართლმადიდებლურ ეკლესიაში უნდა მიმართონ მღვდელმსახურს.
„მღვდელმსახური ვალდებულია, აღნიშნულ პირებს გაესაუბროს და განუმარტოს ქრისტიანული მოძღვრების ძირითადი საკითხები. მას შემდეგ, რაც მღვდელი დარწმუნდება ასეთი პირის გულწრფელ სინანულში, მის სახელზე უნდა გასცეს რეკომენდაცია ეპისკოპოსთან წარსადგენად; რომელმაც ე.წ. „სინანულის ფურცელზე“ მას ხელმოწერით უნდა დაადასტურებინოს საკუთარი გადაწყვეტილება, ხოლო შემდეგ წაუკითხოს შენდობის ლოცვა და მის სახელზე ინდივიდუალურად გასცეს ე.წ. ,,შენდობის ფურცელი“ პირადი ხელმოწერითა და ბეჭდით. აღნიშნული პროცედურის შემდეგ ასეთი პირი კვლავ ჩაითვლება მართლმადიდებელი ეკლესიის წევრად“, – წევრია გავრცელებულ განცხადებაში.
საპატრიარქოს საზოგადოებასთან სამსახური ასევე ავრცელებს „სინანულისა“ და „შენდობის“ ფურცლების ნიმუშებს.
„სინანულის ფურცელი“
„მე, (სახელი, გვარი), რომელიც გაწევრიანებული ვიყავი პოლიტიკურ ორგანიზაცია „გირჩის“ მიერ შექმნილ „საქართველოს ქრისტიანულ, ევანგელისტურ, პროტესტანტულ ეკლესია – ბიბლიურ თავისუფლებაში“ სასულიერო პირის სტატუსით, მსურს კვლავ დავუბრუნდე საქართველოს მართლმადიდებელი ავტოკეფალური ეკლესიის წიაღს. ვაცნობიერებ რა ჩემს დანაშაულს, გამოვთქვამ სინანულს ჩემი ქმედებების გამო და ვითხოვ შენდობას“
„შენდობის ფურცელი“
„შენდობის ფურცელი ეძლევა (სახელი, გვარი) ნიშნად იმისა, რომ დატოვა რა პოლიტიკური ორგანიზაცია „გირჩის“ მიერ შექმნილი „საქართველოს ქრისტიანული, ევანგელისტური, პროტესტანტული ეკლესია – ბიბლიური თავისუფლება“, რომელშიც გაწევრიანებული იყო სასულიერო პირის სტატუსით, და გამოხატა რა სინანული თავისი ქმედებების გამო, ნებაყოფლობით დაუბრუნდა საქართველოს მართლმადიდებელი ავტოკეფალური ეკლესიის წიაღს.
ეპისკოპოსის ან მღვდლის ხელმოწერა“.
„ბიბლიური თავისუფლების“ წევრებზე საუბარი იყო სინოდის 12 თებერვლის განჩინებაშიც. განჩინების მიხედვით, „ბიბლიური თავისუფლების“ წევრების მონანიების გარეშე, მათზე ვერც წესის აგება შესრულდება.
