SJC: აფგან სადიგოვი 159 დღეა, შიმშილობს, მისი ჯანმრთელობის მდგომარეობა კვლავ მძიმეა

„სოციალური სამართლიანობის ცენტრი“ (SJC) აზერბაიჯანელი ჟურნალისტისა და რედაქტორის, აფგან სადიგოვის ჯანმრთელობის მდგომარეობის შესახებ უახლეს ინფორმაციას აქვეყნებს.

ორგანიზაციის ცნობით, აფგან სადიგოვი უკვე 159 დღეა, შიმშილობს და მისი ჯანმრთელობის მდგომარეობა კვლავ სტაბილურად მძიმეა.

SJC-ის თქმით, სადიგოვი 10 თებერვლამდე არ იღებდა წყალს, რის გამოც, მისი ჯანმრთელობის მდგომარეობა უკიდურესად დამძიმდა, სწორედ ამიტომ, ჟურნალისტმა კვლავ დაიწყო წყლის მიღება და როგორც ორგანიზაცია წერს, პერიოდულად თანხმობას აცხადებს ორგანიზმისთვის საჭირო დანამატების მიღებაზე, რომელიც მას გადასხმის მეშვეობით მიეწოდება.

„მიუხედავად შიმშილობის რეჟიმის ცვლილებისა, აფგან სადიგოვის მდგომარეობა კვლავ მძიმეა. ორგანიზს  უკვე დიდი ხანია, არ მიეწოდება საჭირო რაოდენობის ვიტანიმები და მინერალები, რის გამოც მას აღენიშნება ანემიის ნიშნები, რაც სახიფათოა მისი ჯანრთელობისთვის. ექიმების განმარტებით, ხანგრძლივი შიმშილობის პროცესში მისმა ჯანმრთელობის მდგომარეობამ კრიტიკულ ნიშნულს შეიძლება ნებისმიერ დროს მიაღწიოს.

აფგან სადიგოვს აღენიშნება ასევე შენელებული გულისცემა, რის გამოც ექიმები მას დამატებით აძლევენ წამალს. სამწუხაროდ, ის კვლავ უარს აცხადებს სამედიცინო დაწესებულებაში გადაყვანაზე.

აფგან სადიგოვმა 159-დღიანი შიმშილობის პერიოდში 40 კილოგრამი დაიკლო და მისი წონა ამ დროისთვის 56 კილოგრამია. პენიტენციური დაწესებულების ექიმების შეფასებით, ხანგრძლივი შიმშილობის შემდეგ მისი ჯანმრთელობისთვის მოსალოდნელი ზიანი შეიძლება შეუქცევადი აღმოჩნდეს“, – ნათქვამია განცხადებაში.

სოციალური სამართლიანობის ცენტრის ცნობით, აფგან სადიგოვმა შიმშილობა ჯერ კიდევ 2024 წლის 21 სექტემბერს დაიწყო, ორი ავტორიტარული ხელისუფლების მხრიდან უსამართლო მოპყრობისა და გადაწყვეტილებების საპასუხოდ. შიმშილობის დაწყებიდან მე-17 დღეს მისი ჯანმრთელობის მდგომარეობა იმდენად გაუარესდა, რომ N18 სამკურნალო დაწესებულებაში გადაიყვანეს, სადაც ის დღემდე იმყოფება.

„აფგან სადიგოვის ჯანმრთელობის მდგომარეობას ართულებს ისიც, რომ 2020 წელს, აზერბაიჯანში უკანონოდ მეორედ დაკავების შემდეგ, როდესაც მას 7-წლიანი პატიმრობა მიუსაჯეს, მან 242 დღე იშიმშილა. ამ პერიოდის განმავლობაში მისი ჯანმრთელობა იმდენად გაუარესდა, რომ ხანგრძლივი რეაბილიტაცია და საზღვარგარეთ მკურნალობა გახდა აუცილებელი“, – წერს SJC.

ორგანიზაცია აღნიშნავს, რომ აფგან სადიგოვის მდგომარეობის შესახებ ინფორმაცია მიაწოდეს ადამიანის უფლებათა ევროპულ სასამართლოს, რომელიც რეგლამენტის 39-ე წესის შესაბამისად, განიხილავს მოთხოვნას სადიგოვის მიმართ დროებითი ღონისძიების (Interim Measure) გამოყენების და აზერბაიჯანში ექსტრადიციის  შეჩერების თაობაზე.

„ადამიანის უფლებათა ევროპულმა სასამართლომ  2025 წლის 14 იანვარს და 2025 წლის 28 იანვარს მიიღო გადაწყვეტილებები, რომლებშიც საქართველოს ხელისუფლებას მიუთითა, რომ აფგან სადიგოვის გადაცემა აზერბაიჯანისთვის აკრძალულია 2025 წლის 4 მარტამდე.

უნდა აღინიშნოს, რომ ევროპული სასამართლოს ეს გადაწყვეტილებები ერთგვარი შუალედური გადაწყვეტილებებია და 2025 წლის 4 მარტისთვის სასამართლო კვლავ მიიღებს გადაწყვეტილებას ექსტრადიციის უფრო ხანგრძლივი ვადით შეჩერებასთან დაკავშირებით. ჩვენი მხრიდან ევროპულ სასამართლოსთან კომუნიკაცია დასრულებულია და ამ ეტაპზე ველოდებით მის გადაწყვეტილებას დროებითი ღონისძიების უფრო ხანგრძლივი გამოყენების თაობაზე“, – ნათქვამია ინფორმაციაში.