„არა სულორში ჰესის მშენებლობას!”, – სოფელ სულორის მცხოვრებნი ჰესის მშენებლობას ეწინააღმდეგებიან. მათ დღეს აქციაც გამართეს. მოთხოვნებთან დაკავშირებით ავრცელებს პეტიციასაც:
„სულორი არის უნიკალური სოფელი თავისი ბუნებით, ისტორიული მნიშვნელობითა და სამკურნალო წყაროებით. სოფელი ცნობილია სუფთა ჰაერით, ულამაზესი ხეობებით, მდინარეებითა და ტურისტული პოტენციალით. სწორედ ეს ბუნებრივი რესურსები ქმნის ჩვენი ცხოვრების ხარისხს და სოფლის ეკონომიკურ საქმიანობას — აგროტურიზმსა და სოფლის მეურნეობას.
ჩვენ მიგვაჩნია, რომ ჰესის მშენებლობა გამოიწვევს:
- ეკოსისტემის დანგრევას და უნიკალური ბიომრავალფეროვნების დაკარგვას;
- წყლის რესურსების შემცირებას, მათ შორის სამკურნალო წყაროების დაშრობას;
- მოსახლეობის საცხოვრებელი და სოფლის ტრადიციული ცხოვრების წესის დარღვევას;
- მეწყერის, წყალდიდობის და სხვა გეოლოგიური საფრთხეების ზრდას;
- ტურისტული პოტენციალის განადგურებას და სოფლის პერსპექტივის დაკარგვას.
გარდა ამისა, სოფლის მოსახლეობა არ იყო სათანადოდ ინფორმირებული ჰესის პროექტის დეტალების შესახებ და საჯარო განხილვები, თუკი ჩატარდა, გამჭვირვალობის და საზოგადოების ჩართულობის გარეშე მოხდა.
ჩვენ მოვითხოვთ:
- ჰესის მშენებლობასთან დაკავშირებული ყველა სამუშაოს დაუყოვნებლივ შეჩერებას;
- პროექტის სრული ინფორმაციის საჯაროდ გამოტანას;
- დამოუკიდებელი ეკოლოგიური ექსპერტიზის ჩატარებას;
- სოფლის მოსახლეობის აზრის გათვალისწინებას გადაწყვეტილებების მიღების პროცესში;
- ალტერნატიული, ეკოლოგიურად უსაფრთხო ენერგომომარაგების წყაროების ძიებას.
ვუხმობთ საქართველოს მთავრობას, გარემოს დაცვის სამინისტროს და საერთაშორისო ეკოლოგიურ ორგანიზაციებს, დაინტერესდნენ სულორის სოფლის პრობლემით და გადაარჩინონ ეს უნიკალური ადგილი განადგურებისგან“, – წერენ ისინი პეტიციაში.
პროექტი ითვალისწინებს ბუნებრივ ჩამონადენზე მომუშავე დერივაციული ტიპის ჰიდროელექტროსადგურის (სულორი 1 და 2 ჰესების) კასკადის მშენებლობა-ექსპლუატაციას, რომლის განხორციელებაც იგეგმება ვანის მუნიციპალიტეტში, მდინარე სულორის ხეობაში. საპროექტო ჰიდროელექტროსადგურის – სულორი 1 და 2 ჰესების კასკადის ჯამური სიმძლავრე იქნება – 4.8 მგვტ.
