შინაგან საქმეთა სამინისტროს განცხადებით, სამართალდამცავებმა 82 წლის მამაკაცი დამამძიმებელ გარემოებაში ოჯახის წევრის მიმართ ჩადენილი განზრახ მკვლელობის ბრალდებით დააკავეს.
„გამოძიებით დადგინდა რომ ბრალდებულმა მამაკაცმა თეთრიწყაროში, საცხოვრებელ სახლში, მეუღლეს – 87 წლის ქალს ცივი იარაღის გამოყენებით ყელის არეში ჭრილობა მიაყენა, რის შედეგადაც ქალი ადგილზე გარდაიცვალა“, – წერია შსს-ს მიერ გავრცელებულ განცხადებაში.
უწყების ინფორმაციით, პოლიციამ ბრალდებული ცხელ კვალზე დააკავა. შსს-ს თქმით, სამართალდამცველებმა დანაშაულის ჩადენის იარაღი – დანა ნივთმტკიცების სახით ამოიღეს.
შსს-ს განცხადებით, გამოძიება ოჯახის წევრის მიმართ დამამძიმებელ გარემოებაში ჩადენილ განზრახ მკვლელობის ფაქტზე, საქართველოს სსკ-ის 11 პრიმა 109-ე მუხლის მე-2 ნაწილის „ვ“ ქვეპუნქტით მიმდინარეობს და დანაშაული 13-დან 17 წლამდე ვადით თავისუფლების აღკვეთას ითვალისწინებს.
