აშშ-ის ყოფილი პრეზიდენტი და რესპუბლიკელების საპრეზიდენტო კანდიდატი, დონალდ ტრამპი აშშ-ის მოქმედი პრეზიდენტის, ჯო ბაიდენის მიერ კანდიდატურის მოხსნას სოციალურ ქსელში ეხმაურება.
„თაღლითი ჯო ბაიდენი არ იყო შესაფერისი საპრეზიდენტო არჩევნებში მონაწილეობისთვის და, რა თქმა უნდა, არ იყო შესაფერისი პრეზიდენტის თანამდებობისთვის. და არც არასდროს ყოფილა [შესაფერისი]. მან პრეზიდენტის თანამდებობა მხოლოდ სიცრუითა და „ფეიკ ნიუსებით“ მიიღო. მის გარშემო მყოფმა ყველა ადამიანმა, მათ შორის მისმა ექიმმა და მედიამ, იცოდა, რომ მას არ შეეძლო პრეზიდენტი ყოფილიყო. ახლა კი ნახეთ, რა გაუკეთა მან ჩვენს ქვეყანას, როდესაც მილიონობით ადამიანი შემოდის ჩვენს საზღვარზე, სრულიად შეუმოწმებლად, ბევრი ციხეებიდან, ფსიქიატრიული დაწესებულებებიდან და ტერორისტების რეკორდული რაოდენობით. ჩვენ ძალიან დავზარალდებით მისი პრეზიდენტობის გამო, მაგრამ ძალიან სწრაფად გამოვასწორებთ მის მიერ მიყენებულ ზიანს“, – აღნიშნა დონალდ ტრამპმა.
დონალდ ტრამპმა CNN-თან სატელეფენო საუბარში კი აღნიშნა, რომ კამალა ჰარისის დამარცხება უფრო ადვილი იქნება, ვიდრე ჯო ბაიდენის იქნებოდა.
ამერიკის პრეზიდენტმა, ჯო ბაიდენმა კანდიდატურა მოხსნა. გავრცელებულ წერილში ბაიდენი აღნიშნავს, რომ ის არ აპირებს ნოემბერში საპრეზიდენტო არჩევნებში მონაწილეობას და სჯერა, რომ ეს ქვეყნის საუკეთესო ინტერესშია.
ბაიდენმა ვიცე-პრეზიდენტ კამალა ჰარისს მხარი ოფიციალურად დაუჭირა და პარტიას შესთავაზა, რომ სწორედ ჰარისი იყოს მათი საპრეზიდენტო კანდიდატი.
„დემოკრატებო – დროა გავერთიანდეთ და დავამარცხოთ ტრამპი. Მოდი გავაკეთოთ ეს”, – წერს ბაიდენი.
