უკრაინის კიროვოგრადის ოლქის ქალაქ კროპივნიცკიზე რუსული თავდასხმის შედეგად 8 ადამიანი დაშავდა, მათგან 1 ბავშვია.
ინფორმაცია უკრაინის საგანგებო სიტუაციების სახელმწიფო სამსახურმა გაავრცელა.
უწყების ცნობით, „19 მარტის ღამეს რუსებმა კროპივნიცკიზე დარტყმები დრონებით მიიტანეს. თავდასხმას მოჰყვა სამოქალაქო ინფრასტრუქტურის განადგურება. დაზიანდა საცხოვრებელი კორპუსები რამდენიმე უბანში: ჩაიმსხვრა მინები, ჩამოინგრა აივნები, დაზიანდა კონსტრუქციები. წინასწარი ინფორმაციით, დაშავებულია რვა ადამიანი, მათ შორის ერთი ბავშვია“, – განაცხადა უწყებამ.
უკრაინის საჰარეო ძალების ინფორმაციით, რუსეთმა უკრაინას ღამით 171 ირანული დრონით, „შაჰიდით“ შეუტია, ასევე, გაუშვა სხვადასხვა ტიპის დრონის სტიმულატორები.
უკრაინის განცხადებით, ჩამოაგდეს 75 „შაჰიდი“, ხოლო 63 „დაკარგულია უარყოფითი შედეგების გარეშე“.
საჰაერო ძალების ცნობით, თავდასხმა შეეხო როგორც კიროვოგრადის, ისე სუმის და დონეცკის რეგიონებს.
პარალელურად უკრაინა დრონებით თავს დაესხა რუსულ ქალაქ ენგელსს.
სარატოვის ოლქის გუბერნატორის, რომან ბუსარგინის განცხადებით, შედეგად ცეცხლი გაჩნდა აეროდრომის ტერიტორიაზე. მისივე თქმით, დაზიანდა 30-მდე კერძო სახლი.
გარდა ამისა, გუბერნატორის მტკიცებით, უკრაინელების ეს შეტევა იყო ყველაზე მასობრივი თავდასხმა ომის დაწყების შემდეგ.
