პრემიერ-მინისტრ ირაკლი ღარიბაშვილის ინფორმაციით, სახელმწიფომ უკვე დაუკვეთა „ფაიზერის“ სამკურნალო მედიკამენტი და მიმდინარეობს „მერკის“ მედიკამენტზე მუშაობა.
პრემიერის თქმით, დაწყებულია ინფიცირების მორიგი, ახალი ტალღის აღმასვლა, რაც ახალი შტამის, „ომიკრონის“ და სადღესასწაულო დღეებში შეკრებებისა და ზამთრის საკურორტო ზონებში გაზრდილი მობილობით არის გამოწვეული.
ირაკლი ღარიბაშვილმა მოსახლეობას კიდევ ერთხელ მოუწოდა ვაქცინაციის, პირბადის ტარებისა და სოციალური დისტანციის დაცვისკენ.
„ხვალ გვექნება კოვიდსაბჭო და დამატებით ვიმსჯელებთ ვითარებაზე. პირბადის ტარება არის აუცილებელი. ეს არის პრევენციის და დაცვის საშუალება და ხალხმრავალი შეკრებებისგან თავის აცილება. მესმის, რომ ახალი წლის დღეებში საკმაოდ გაზრდილია მობილობა.
ამას გარდა, „ომიკრონის“ შტამმაც განაპირობა ის, რომ შემთხვევების რაოდენობამ საგრძნობლად იმატა, თუმცა ჩვენ არ უნდა დაგვავიწყდეს, რომ გვჭირდება კიდევ უფრო მეტი მობილიზება და ის, რაც ხდება ევროპაში, კარგი გაკვეთილია ჩვენთვის.
მაგალითად, საფრანგეთში 200 ათასს გადააჭარბა ინფიცირებულთა დღიურმა რაოდენობამ. ამერიკაში ინფიცირების მილიონი შემთხვევა დაფიქსირდა ერთ დღეში. ამიტომ, ჩვენ უნდა მოვემზადოთ, ვიყოთ მობილიზებული, არ უნდა მოვდუნდეთ იმის გამო, რომ „ომიკრონი“ შედარებით სუსტი შტამია და შედარებით მსუბუქად გადააქვთ მოქალაქეებს. კიდევ ერთხელ უნდა მოვუწოდოთ მოსახლეობას, ვატაროთ პირბადე, დავიცვათ დისტანცია და რაც მთავარია ვაქცინაცია, ეს არის დაცვის ყველაზე ეფექტური საშუალება, გავუფრთხილდეთ ჩვენს ახლობლებს და ოჯახის წევრებს“, – განაცხადა პრემიერ-მინისტრმა.
