„ქართულმა ოცნებამ“ დაარეგისტრირა კანონპროექტთა პაკეტი, რომელთა შორის ერთ-ერთია „პროფესიული თეატრების შესახებ“ კანონში ცვლილების შეტანის თაობაზე.
კანონპროექტის მიხედვით, ახლებურად განისაზღვრა პროფესიული სახელმწიფო და პროფესიული მუნიციპალური თეატრების მართვასთან დაკავშირებული საკითხები.
უქმდება თეატრის მართვის ორსაფეხურიანი მოდელი – შემოთავაზებული კანონპროექტით, თეატრს ერთპიროვნულად უხელმძღვანელებს თეატრის დირექტორი და გაუქმდება სამხატვრო ხელმძღვანელის, როგორც თეატრის საერთო ხელმძღვანელის თანამდებობა.
მეორე მოსმენით დოკუმენტში შევიდა ცვლილება, რომლის მიხედვითაც, თეატრის დირექტორი მხოლოდ იმ შემთხვევაში შეითავსებს სამხატვრო ხელმძღვანელის ფუნქციებს, თუ მას უმაღლესი სახელოვნებო განათლება აქვს. წინააღმეგ შემთხვევაში, მას კვალიფიციური კადრის მოწვევა შეეძლება.
კანონპროექტით ასევე წესრიგდება თეატრის დირექტორის დანიშვნისა და გათავისუფლების წესი და საფუძვლები.
კერძოდ, სამინისტროს მიერ დაფუძნებულ სახელმწიფო თეატრში, აჭარის და აფხაზეთის ავტონომიური რესპუბლიკების სახელმწიფო თეატრში თეატრის დირექტორს ნიშნავს კულტურის მინისტრი. ის ასევე უფლებამოსილი იქნება, გამოაცხადოს კონკურსი.
მუნიციპალურ თეატრებში დირექტორს დანიშნავს მერი.
„სამინისტროს მიერ დაფუძნებულ პროფესიულ სახელმწიფო თეატრში თეატრის დირექტორს საკუთარი შეხედულებით ნიშნავს მინისტრი. მინისტრი ასევე უფლებამოსილია, თეატრის დირექტორი დანიშნოს კონკურსის საფუძველზე, ან სარეკომენდაციო საბჭოს ან/და სამხატვრო საბჭოს წარდგინებით. ან/და უარი თქვას მათი წარდგენილი კანდიდატის დანიშვნაზე და დირექტორი დანიშნოს საკუთარი შეხედულებით “, – აღნიშნულია კანონპროექტში.
კანონი განსაზღვრავს მინისტრის მიერ თეატრის დირექტორის გათავისუფლების საფუძვლებსაც.
ასეთ საფუძვლებს შორისაა – სარეკომენდაციო საბჭოს მიერ წარდგენილი რეკომენდაცია; თეატრის დასის ან სამხატვრო საბჭოს დასაბუთებული მოთხოვნა; მინისტრის ინიციატივა, რის შესახებაც დირექტორს ეცნობება ერთი თვით ადრე და ეძლევა ერთი თვის ხელფასი, ასევე მინისტრის ინიციატივა, რის შესახებაც დირექტორს ეცნობება 3 დღით ადრე და მიეცემა 2 თვის ხელფასი კომპენსაციად.
ამ კანონის ამოქმედებისთანავე პროფესიული სახელმწიფო და პროფესიული მუნიციპალური თეატრების სამხატვრო ხელმძღვანელები ჩაითვლებიან თეატრების დირექტორებად.
კანონის ამოქმედებისთანავე თანამდებობიდან გათავისუფლდებიან თეატრების დირექტორები, რომლებიც პოსტზე კანონის ამოქმედებამდე დაინიშნენ.
„ამ კანონის ამოქმედებიდან 10 დღის ვადაში, წერილობითი თანხმობის შემთხვევაში, ისინი დაინიშნონ იმავე თეატრის საშტატო ნუსხით გათვალისწინებულ ვაკანტურ თანამდებობაზე. იმ შემთხვევაში თუ ამ პუნქტით გათვალისწინებულ ვადაში პირმა არ გამოხატა წერილობითი თანხმობა იმავე თეატრში ვაკანტურ თანამდებობაზე დანიშვნასთან დაკავშირებით, ან არ არსებობს იმავე თეატრში ვაკანტური თანამდებობა, გათავისუფლებულ პირს შესაბამისი თეატრის მიერ ეძლევა კომპენსაცია ბოლო თანამდებობრივი სარგოს 3 თვის ოდენობით“, – აღნიშნულია კანონპროექტში.
კანონი ამოქმედდება გამოქვეყნებისთანავე. მისი დაჩქარებული წესით განხილვა მოთხოვნილი არ არის, შესაბამისად, „ოცნება“ მის მიღებას, სავარაუდოდ, თვე-ნახევარში შეძლებს.
„მოქმედი კანონის მიხედვით, სამხატვრო ხელმძღვანელი არის თეატრის საერთო ხელმძღვანელი, რომელიც განსაზღვრავს მის შემოქმედებით მიმართულებას და პასუხს აგებს თეატრის ფუნქციონირებისთვის. ამასთანავე, „პროფესიული თეატრების შესახებ“ საქართველოს კანონი ითვალისწინებს თეატრის დირექტორის თანამდებობას, რომელიც მისთვის მინიჭებული უფლებამოსილების ფარგლებში ახორციელებს თეატრის ადმინისტრაციულ-ტექნიკურ, ორგანიზაციულ და ფინანსურ საქმიანობას. თეატრის მართვის აღნიშნული ფორმა არ არის მოქნილი და ვერ უზრუნველყოფს თანამედროვე გამოწვევების გადაჭრას, შესაბამისად, საჭიროა აღნიშნული ორი თანამდებობის გაერთიანება და თეატრის ერთპიროვნულ ხელმძღვანელად თეატრის დირექტორის განსაზღვრა, რომელიც განახორციელებს თეატრის შემოქმედებით, საფინანსო, ადმინისტრაციულ, ტექნიკურ და ორგანიზაციულ საქმიანობას“, – აღნიშნულია განმარტებით ბარათში.
ამ კანონპროექტთა პაკეტის ძირითადი პროექტია „საჯარო სამსახურის შესახებ“ კანონში ცვლილება.
ცვლილების მიხედვით, საჯარო სამართლის იურიდიული პირის ხელმძღვანელი ან ხელმძღვანელის მოადგილე სახელმწიფო მოსამსახურესთან გათანაბრებული პირები იქნებიან (გარდა ზოგადსაგანმანათლებლო დაწესებულების, უმაღლესი საგანმანათლებლო დაწესებულებისა და პროფესიული საგანმანათლებლო დაწესებულებისა, აგრეთვე, სამეცნიერო, კვლევითი, სასპორტო ან რელიგიური საქმიანობის განმახორციელებელი საჯარო სამართლის იურიდიული პირისა).
პროექტით, საჯარო დაწესებულების რეორგანიზაციის გამო შტატების შემცირების შემთხვევაში, სამსახურიდან გათავისუფლებულ მოხელეს მიეცემა კომპენსაცია – 1 თვის თანამდებობრივი სარგოს ოდენობით.
კანონპროექტთა ავტორები „ოცნების“ დეპუტატები არიან: არჩილ გორდულაძე, თორნიკე ჭეიშვილი, რატი იონათამიშვილი, დავით მათიკაშვილი, გურამ მაჭარაშვილი, ალექსანდრე ტაბატაძე, თენგიზ შარმანაშვილი, ალუდა ღუდუშაური, ვიქტორ ჯაფარიძე, სოზარ სუბარი, ნოდარ ტურძელაძე, ირმა ზავრადაშვილი, ლევან მაჭავარიანი, რამინა ბერაძე, ირაკლი კირცხალია, სალომე ჯინჯოლავა, თორნიკე ბერეკაშვილი, გენრიეტა წიწავა, მამუკა მდინარაძე.
კანონპროექტი მე-2 მოსმენით 18 მარტს მიიღეს
