ევროკომისიის პრეზიდენტი, ურსულა ფონ დერ ლაიაენი აცხადებს, რომ ევროკავშირს ტრამპის ტარიფების საპასუხოდ ძლიერი გეგმა აქვს.
მისი თქმით, EU უპირატესობას მოლაპარაკებას ანიჭებს, თუმცა ყველა საპასუხო ზომა განიხილება.
დონალდ ტრამპმა, რომელმაც პრეზიდენტად არჩევის შემდეგ ტრანსატლანტიკური ურთიერთობების 8 ათწლეულის განმავლობაში არსებულ გარანტიებში არეულობა შეიტანა, ამერიკულ საქონელზე მთელი მსოფლიოს მასშტაბით მაღალი ტარიფების დაწესებით იმუქრება.
მისმა ადმინისტრაციამ მარტში ტარიფები დააწესა EU-დან იმპორტირებულ ფოლადსა და ალუმინზე და განაცხადა, რომ მანქანებზე უფრო მაღალი გადასახადები ძალაში 10 აპრილიდან შევა.
ფონ დერ ლაიენმა თქვა, რომ შემდეგი სექტორები, რომლებზეც ტარიფები დაწესდება, იქნება ნახევარგამტარები [ჩიპები], ფარმაცევტული პროდუქტები და ხე-ტყე.
მისი თქმით, ბევრი ევროპელი თავს „სრულიად დათრგუნვილად” გრძნობს აშშ-ის განცხადებების გამო.
„ეს კონფრონტაცია ევროპას არ დაუწყია. ჩვენ არ გვსურს საპასუხო ზომების მიღება, მაგრამ თუ საჭირო გახდება, საამისოდ გვაქვს ძლიერი გეგმა და ჩვენ მას გამოვიყენებთ”. – თქვა ევროკომისიის პრეზიდენტმა.
მარტში ფოლადისა და ალუმინზე ექსპორტზე 25%-იანი ტარიფების გამოცხადების შემდეგ ევროკომისიამ განაცხადა, რომ საპასუხოდ აშშ-ის საქონლის ევროკავშირში ექსპორტზე ასევე დააწესებდა 25%-იანა ტარიფებს, რაც 26 მილიარდი ევროს ღირებულების საქონელს მოიცავს, მათ შორის, ჯინსებსა და „ჰარლი დავიდსონის” ბრენდის მოტოციკლებზე, რაც თავის მხრივ, 4.5 მილიარდი აშშ დოლარის ღირებულებისაა. ამ 2 საქონელზე ტარიფები ჯო ბაიდენის პირობებში შეჩერებული იყო.
ეს ტარიფები ძალაში აპრილის შუა რიცხვებიდან შევა – თარიღად თავდაპირველად 1 აპრილი იყო განსაზღვრული, თუმცა, ევროკავშირმა გადაწყვიტა, ისინი სხვა ნაბიჯებთან შესაბამისობაში მოიყვანოს და დააზუსტოს 27 წევრი სახელმწიფოს პოზიცია.
თუმცა, ევროკომისია ზეწოლას განიცდის ევროპული ქვეყნებიდან. მაგალითად, საფრანგეთი შეშფოთებულია ფრანგულ ღვინოსა და სპირტიან სასმელებზე მოსალოდნელი გავლენის გამო.
