„ვაქცინის მწარმოებლების მოთხოვნაა, ზიანის დადგომის შემთხვევაში, პასუხისმგებლობა ქვეყნებმაც გაიზიარონ“ - რას გულისხმობს კანონპროექტი

ჯანდაცვის კომიტეტმა დღევანდელ სხდომაზე „საზოგადოებრივი ჯანმრთელობის შესახებ“ საქართველოს კანონში ცვლილების შეტანის თაობაზე“ კანონპროექტი I მოსმენით განიხილა.

კანონპროექტს, რომლის მიღებაც Covid-პანდემიას უკავშირდება, პარლამენტი დაჩქარებული წესით განიხილავს.

როგორც კანონპროექტის წარდგენისას ჯანდაცვისა კომიტეტის თავმჯდომარემ დიმიტრი ხუნდაძემ განაცხადა, კანონში ცვლილებები დაკავშირებულია მოსახლეობის რაც შეიძლება დროულ და ხარისხიან ვაქცინაციასთან.

მისი თქმით, ხარისხიანი ვაქცინის სწრაფად შემოტანა საქართველოში საკანონმდებლო დონეზე უნდა მოხდეს, რომელიც პირველ რიგში, მიზნობრივ ჯგუფებზე იქნება გათვლილი. მისივე თქმით, გარდა იმისა, რომ ქვეყანაში ვაქცინის შემოტანისთვის შესაფერი ინფრასტრუქტურული გარემო უნდა იყოს შექმნილი, შესაბამისი საკანონმდებლო ბაზაც უნდა არსებობდეს, კერძოდ, სახელმწიფოს მხრიდან პასუხისმგებლობა უნდა იყოს აღებული ვაქცინაციის პროცესში შესაძლო დამდგარ ზიანთან დაკავშირებით.

„საქართველო კორონავირუსთან ბრძოლის ახალ ეტაპზე გადადის. ჩვენ უნდა უზრუნველვყოთ, სწრაფი, ხარისხიანი ვაქცინა და უნდა მოვახდინოთ, პირველ რიგში, მიზნობრივი ჯგუფების ვაქცინაცია და შემდეგ ის პრაქტიკულად მთელს მოსახლეობაზე გავრცელდეს. ამისათვის საჭიროა გარდა ინფრასტრუქტურული მზაობისა, საკანონმდებლო ბაზა იყოს მზად. უნდა იქნას სახელმწიფოს მხრიდან აღებული პასუხისმგებლობა ვაქცინაციის პროცესში შესაძლო დამდგარ ზიანთან დაკავშირებით, თუ ზიანი, რა თქმა უნდა, არ არის მედპერსონალის, კლინიკის, ან იმპორტიორის შეცდომით განპირობებული. ასეთი მოთხოვნა აქვთ მწარმოებლებს, ჩვენ ვკონტაქტობთ მწარმოებლებთან “კოვაქს” პლატფორმის საშუალებით და მწარმოებლებს აქვთ ეს მოთხოვნა: ზიანის დადგენის შემთხვევაში, პასუხისმგებლობა ქვეყნებმაც გაიზიარონ. ამ მოთხოვნის უზრუნველყოფა უკვე ძალიან ბევრმა ქვეყანამ მოახდინა, მათ შორის, აშშ-მა და არა მხოლოდ მათ… ამიტომ საქართველოც უზრუნველყოფს ეს პასუხისმგებლობა აიღოს და აიყვანოს საკანონმდებლო დონეზე და ამით ხელი არ შეუშალოს, რომ სწრაფად შემოვიტანოთ ქვეყანაში ვაქცინა და ის მაღალხარისხიანი იყოს”, – განუცხადა ხუნდაძემ ჟურნლისტებს. 

დიმიტრი ხუნდაძის განმარტებით, ამგვარად, კანონპროექტის მიღებამ ხელი უნდა შეუწყოს ახალი კორონავირუსით გამოწვეული ინფექციის (COVID-19) საწინააღმდეგო ფარმაცევტულ პროდუქტთან დაკავშირებული პასუხისმგებლობის გადანაწილებას, რაც ემსახურება კორონავირუსით (COVID-19-ით) გამოწვეული ეპიდემიის/პანდემიის წინააღმდეგ ეფექტიან ბრძოლას და ყველა იმ აუცილებელი ორგანიზაციული, სამართლებრივი და სხვა სახის ღონისძიებების გატარებას, რომელიც შექმნილი ვითარების გამკლავებისკენ იქნება მიმართული.

კანონპროექტის განმარტებით ბარათში ნათქვამია, საჭიროა, საკანონმდებლო დონეზე, მკაფიოდ იყოს განსაზღვრული კანონმდებლის მიდგომა იმ ვაქცინებთან მიმართებაშიც, რომელიც არ შედის აცრების ეროვნულ კალენდარში (Covid-19-ის საწინააღმდეგო ვაქცინაციაც) არსებული ძირითადი პრინციპების შეუცვლელად.

კერძოდ, კანონპროექტით, „საზოგადოებრივი ჯანმრთელობის შესახებ“ საქართველოს კანონს, გარდამავალი რეგულირების სახით, ემატება 45⁵  მუხლი, რომლის თანახმად:

პანდემიასთან/ეპიდემიასთან დაკავშირებით ახალი კორონავირუსით (SARS-CoV-2) გამოწვეული ინფექციის (COVID-19) საწინააღმდეგო პროფილაქტიკური აცრისათვის ან მკურნალობისთვის განკუთვნილი ფარმაცევტული პროდუქტის შემოტანისას, როდესაც ფარმაცევტულ პროდუქტს ჯანმრთელობის მსოფლიო ორგანიზაციის ან მის მიერ აღიარებული მკაცრი მარეგულირებელი ორგანოების (SRAs) მხრიდან მინიჭებული აქვს გამოყენების (მათ შორის გადაუდებელი გამოყენების) ავტორიზაცია ან პრეკვალიფიკაცია, ამ ფარმაცევტული პროდუქტის გამოყენების შედეგად შესაძლო ზიანზე პასუხისმგებელია სახელმწიფო, გარდა იმ შემთხვევისა, როდესაც ზიანზე პასუხისმგებლობა ეკისრება:

ა) იმპორტიორს, სამედიცინო პერსონალს, სამედიცინო დაწესებულებას თუ ზიანი გამოწვეულია, შესაბამისად იმპორტიორის მიერ დაშვებული შეცდომით, ან ამავე კანონის 42-ე მუხლის მე-2 პუნქტის გათვალისწინებით სამედიცინო პერსონალის ან სამედიცინო დაწესებულების მიერ დაშვებული შეცდომით;

ბ) პროდუქტის მწარმოებელს, მწარმოებელთან გაფორმებული ხელშეკრულების შესაბამისად;