კლინიკა „ვივამედი“ ალეკო ელისაშვილის პირადი ინფორმაციის გავრცელების საკითხზე სამართალდამრღვევად ცნეს.
კერძოდ, „ვივამედი“ ადმინისტრაციულ სამართალდამრღვევად იქნა ცნობილი კანონით გათვალისწინებული საფუძვლის გარეშე განსაკუთრებული კატეგორიის მონაცემთა დამუშავებისთვის და გაფრთხილება შეეფარდა.
დადგენილების მიხედვით, ნინო ნადირაძემ უნდა წაშალოს ის პოსტი, რომელშიც ელისაშვილის პირად ინფორმაციას განიხილავს.
ალეკო ელისაშვილმა იანვარში გაავრცელა ინფორმაცია, რომ დაკავების შემდეგ კლინიკა „ვივამედში“ უთხრეს, რომ სხეულზე მხოლოდ დაჟეჟილობები აღენიშნებოდა, თუმცა მოგვიანებით გადაღებული ტომოგრაფიით დაადგინა, რომ ნეკნი ჰქონია მოტეხილი.
ალეკო ელისაშვილის მიერ გავრცელებულ ინფორმაციას მოგვიანებით სოციალურ ქსელში გამოეხმაურა კლინიკა „ვივამედის” დირექტორი ნინო ნადირაძე. მან ელისაშვილის სამედიცინო ინფორმაცია საჯაროდ განიხილა და პოსტს თან დაურთო რენტგენის ფოტო.
ალექსანდრე ელისაშვილი თავისუფლების მოედანზე, სასტუმრო „ქორთიარდ მარიოტთან“ 4 დეკემბერს დააკავეს.
მოგვიანებით ცნობილი გახდა, რომ მისი დაკავება უკავშირდებოდა საქართველოში აზერბაიჯანელთა ეროვნული კონგრესის თავმჯდომარის, ალი ბაბაევის საქმეს.
მას ბრალდება საქართველოს სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით (ადამიანის დევნა პოლიტიკურ მოღვაწეობასთან დაკავშირებით, ჩადენილი ძალადობით) წარედგინა, რაც სასჯელის სახედ და ზომად სამ წლამდე თავისუფლების აღკვეთას ითვალისწინებს.
16 დეკემბერს ელისაშვილი 4000-ლარიანი გირაოს სანაცვლოდ გათავისუფლდა.
პროკურატურის შუამდგომლობის საფუძველზე თბილისის საქალაქო სასამართლომ მას აღკვეთის ღონისძიება, პატიმრობა, გირაოთი შეუცვალა.
