თბილისის საკრებულომ ნაძალადევის რაიონში, ყოფილი, ე.წ. ვაგონშემკეთებელი ქარხნის ტერიტორიაზე მიწის 10 ნაკვეთზე მრავალფუნქციური კომპლექსის განაშენიანების რეგულირების გეგმის გეგმარებითი დავალებაზე თანხმობა გასცა.
ინვესტორი 21.7 ჰა ტერიტორიის ძირითადად საცხოვრებელი ფუნქციით დატვირთვასა და მის განაშენიანებას გეგმავს. დოკუმენტების მიხედვით, განაშენიანება ამ ეტაპისთვის 420 000კვ.-ზე იგეგმება.
უძრავი ქონების სააგენტოს მონაცემებით, აღნიშნული ტერიტორიაზე 8 მიწის ნაკვეთს კომპანია შპს „ვილსონ გარდენი“ ფლობს. დანარჩენებს, სს „ფროფგრუპი“ და შპს „იუ ეს თრეიდინგ კომპანი“. შპს „ვილსონ გარდენის“ სამეთვალყურეო საბჭოს წევრია „ქართული ოცნების“ დეპუტატის ნინო წილოსანის ძმა ირაკლი წილოსანი. სამეთვალყურეო საბჭოს წევრები არიან ასევე დეპუტატის ბიძაშვილი გვანცა წილოსანი და ირაკლი რუხაძე, რომელიც ტელეკომპანია „იმედის“ მფლობელი კომპანიის დირექტორია.
აღნიშნულ შპს-ს, „ვილსონ გარდენს“ სააქციო საზოგადოება „ფროფგრუპი“ ფლობს, ამ უკანასკნელთან კი წილოსანების ოჯახის წევრებს კავშირები აქვთ.
„ფროგრუპის“ დირექტორი გურამ რატიანი თავის მხრივ არის ნინო წილოსანის მამის, ბადრი წილოსანის კომპანიის შპს „ვაგონმშენებელი კომპანიის“ დირექტორიც.
2013 წელს საგამოძიებო სამსასახურმა „ვაგონმშენებელი კომპანიის“ მფლობელი, დეპუტატ ნინო წილოსანის მამა ბადრი წილოსანი და კომპანიის სამი დირექტორი დააკავეს. მათ შორის იყო ნინო წილოსანის ყოფილი მეუღლე ვლადიმერ აბულაძეც.
საგამოძიებო სამსახური აცხადებდა, რომ კომპანიამ საქართველოს რკინიგზას 65 მილიონი ლარის ზიანი მიაყენა.
მნიშვნელოვანია, რომ საპროექტო არეალში შეყვანილია მიმდებარე არტ-ჰოლის პარკის ტერიტორია.
დოკუმენტების მიხედვით, შენობა-ნაგებობების ფუნქციები მთლიანი არეალისთვის შემდეგნაირად გადანაწილდება: 75% – საცხოვრებელი, კომერციული – 25%, რომელიც ასევე შეიძლება შეიცვალოს და კომერციული ფუნქციით 10%-მდე შემცირდეს. ჯამური საცხოვრებელი ფართობი იქნება 445 904 კვ.მ.
წარმოდგენილი დოკუმენტაციის მიხედვით, შენობები მაქსიმუმ 33 სართული იქნება, ხოლო სიმაღლე – 119 მეტრი. ტერიტორიაზე რჩება 5 არსებული შენობა, რომლებსაც შეეცვლებათ ფუნქციური დანიშნულება და მოხდება მათი რეკონსტრუქცია-რეაბილიტაცია.
დოკუმენტების თანახმად, პროექტის განხორციელებისათვის საჭიროა დაახლოებით 10-15 წელი.
დოკუმენტების მიხედვით, ტერიტორიაზე წარმოდგენილია 836 ძირი სხვადასხვა სახეობისა და დიამეტრის ხე‐მცენარე. მათი თქმით, აღნიშნული მცენარეების მოჭრა‐გადარგვა უნდა მოხდეს ქალაქ თბილისის მერიის შესაბამისი სამსახურის ზედამხედველობით.
ამ საკითხზე „პუბლიკა“ ესაუბრა თბილისის მიწათსარგებლობის გენერალური გეგმის ერთ-ერთ ავტორს, მამუკა სალუქვაძეს. მისი თქმით, გენერალური გეგმის მიხედვით, რკინიგზის მიმდებარე, დაახლოებით, 70 ჰა ტერიტორიაზე ერთიანი ხედვით უნდა გაშენებულიყო და შექმნილიყო მულტიფუნქციური არეალი, რომელიც დაიტვირთებოდა საოფისე და რეკრეაციული ფუნქციით.
„ეს არეალი, 70 ჰა ტერიტორია ერთნაირი ხედვით უნდა განვითარებულიყო. ახლა, როგორც ვიცი, 20 ჰა ტერიტორიის განაშენიანებაზეა საუბარი. ძალიან კარგი იქნებოდა, რომ ქალაქს საერთაშორისო კონკურსი გამოეცხადებინა ამ ტერიტორიის განვითარებისთვის. სამწუხაროდ, ეს არ მოხდა და ახლა ჩვენ ახალ, მასშტაბურ საცხოვრებელ კვარტალზე ვსაუბრობთ. ეს არის უამრავი საცხოვრებელი სახლი, რომლის საჭიროებაც არ არის ქალაქში. ეს სჭირდება მხოლოდ ბიზნესმენს, დეველოპერს“, – განაცხადა მამუკა სალუქვაძემ.
მისი თქმით, ქალაქის ეს ნაწილი უნდა გადაქცეულიყო მეორე ცენტრად, მტკვრის მარცხენა სანაპიროზე, რომელსაც სჭირდება სარეკრეაციო სივრცე და ეს მწვანე ნაწილი საპროექტო არეალში უნდა მოხვედრილიყო.
„გენგეგმის მიხედვით, ტერიტორიის 50% ამ ტერიტორიაზე უნდა იყოს რეკრეაცია. ქალაქში ისედაც არ არის რეკრეაცია, ძალიან მწირია. ძლივს ხდება გამწვანება რაღაც ტერიტორიის, ქალაქი მუშაობს ამაზე, მაგრამ ეს არ არის საკმარისი ქალაქის განაშენიანებულ ნაწილში. ამიტომ ვამბობდით, რომ ამგვარი ტერიტორიები გამოვიყენოთ გამწვანებისა და რეკრეაციისთვის. ეს გამოიწვევდა იმას, რომ საოცრად ამაღლდებოდა იქ ხარისხიც და მიწის ფასიც. ახლა ვიღებთ ისევ საცხოვრებელ კვარტალს. მე მიმაჩნია, რომ ეს არ არის სწორი და გენგეგმას ამგვარი რეკომენდაცია არ გაუცია“, – თქვა მამუკა სალუქვაძემ.
