წინასწარი მონაცემებით, „კავკასიონის“ დაზიანების მიზეზი ხანძრის კერა გახდა - „საქართველოს ელექტროსისტემა“

„საქართველოს სახელმწიფო ელექტროსისტემა“ განცხადებას ავრცელებს და ამბობს, რომ დღეს, 19 აპრილს, 11:08 საათზე ავარიულად გამოირთო 500 კვ. ელექტროგადამცემი ხაზი – „კავკასიონი“.

მათივე განცხადებით, გენერაციის ობიექტების გამორთვის შედეგად 11:15 საათზე საქართველოს თითქმის ყველა რეგიონში მომხმარებლის დაახლოებით 90% შეუწყდა ელექტროენერგიის მიწოდება:

„წინასწარი მონაცემებით ელექტროგადამცემი ხაზის დაზიანების მიზეზი გახდა ხანძრის კერა. ელექტროგადამცემი ხაზის გათიშვის შედეგად, ელექტროსისტემაში მოხდა ელექტრული პარამეტრების დარღვევა, გამოირთო ენგურჰესი და სხვა დიდი და მცირე ელექტროსადგურები.
გენერაციის ობიექტების გამორთვის შედეგად 11:15 საათზე საქართველოს თითქმის ყველა რეგიონში მომხმარებლის დაახლოებით 90% შეუწყდა ელექტროენერგიის მიწოდება.
„საქართველოს სახელმწიფო ელექტროსისტემის“ მხრიდან მოხდა მყისიერი რეაგირება, უმოკლეს დროში, 35 წუთში მოხერხდა ელექტროენერგეტიკული სისტემის გამანაწილებელ კომპანიებზე ელექტროენერგიის სრულად მიწოდება“, – წერია განცხადებაში.