კულტურისა და სპორტის მინისტრი, თეა წულუკიანი რუსული კანონის ხელახლა ინიციირებას მიესალმება და ამბობს, რომ „საზოგადოებას უფლება გვაქვს, ოფიციალურად ვიცოდეთ იმ ქართული არასამთავრობო ორგანიზაციების შესახებ, რომლებიც ანტიქართულ საქმეს ემსახურებიან და უარს ამბობენ გამჭვირვალობაზე“.
„სასურველი და აუცილებელია, რომ ვიგრძნოთ საფრთხე და დავინახოთ რეალობა, რომელიც არაა დამამშვიდებელი. ბოლო რამდენიმე წელია, საქართველო ისეთ მდგომარეობაშია, როგორც თვითმფრინავი, რომელიც მიფრინავს და ცუდი ამინდი ჰაერში აბურთავებს. ეს დაიწყო ბევრად ადრე, ვიდრე უკრაინაში ომი დაიწყებოდა. ჩვენი ქვეყანა ასეთ ვითარებაში უკვე რამდენიმე წელია და ასეთ დროს აუცილებელია უსაფრთხოების დამატებითი ღვედები. სწორედ ამ ფუნქციას შეასრულებს გამჭვირვალობის კანონი და მინდა, სიხარულით მივესალმო ამ კანონპროექტის დაინიცირებას გუშინ საპარლამენტო უმრავლესობის მიერ“, – განაცხადა თეა წულუკიანმა.
მისივე თქმით, ამ საფრთხეს გრძნობს საზოგადოების უმეტესობა, მაგრამ არიან ჯგუფები, რომლებიც ცდილობენ, კანონის მიღებას სირთულეები შეუქმნან. თეა წულუკიანი ამბობს, რომ კანონი რუსული არ არის.
„ვერავინ, მათ შორის საქართველოში ევროკავშირელი ელჩი, ვერ იტყვის, რომ ეს კანონი რუსულია. თვითონ ევროკავშირმა ამ კანონის მიღება შარშან დაიწყო. ჩვენი უმრავლესობის მიერ წინა წელს ამ კანონის ინიციირებიდან დღემდე მრავალი რამ შეიცვალა, მათ შორის ის, რომ იდენტური კანონის მიღება დაიწყო ბრიუსელში ევროკავშირმა.
ევროკავშირის სხვადასხვა ქვეყანამ ზუსტად ისეთივე კანონის შემუშავება დაიწყო, როგორიც ჩვენ გუშინ დავიწყეთ, მაგალითად, ისეთმა დიდმა ქვეყანამ, როგორიცაა საფრანგეთი. საზოგადოებას უფლება გვაქვს, ოფიციალურად ვიცოდეთ იმ ქართული არასამთავრობო ორგანიზაციების შესახებ, რომლებიც ანტიქართულ საქმეს ემსახურებიან და უარს ამბობენ გამჭვირვალობაზე. ვისაც არაფერი აქვს დასამალი, ის მშვიდადაა და ფინანსებში გამჭვირვალობა ყველასთვის უნდა იყოს წამყვანი. ერთადერთი სექტორი, სადაც ფინანსურად ყველაფერი გაუმჭვირვალეა, მხოლოდ არასამთავრობო სექტორია. აქ გაჯანსაღებას მხოლოდ და მხოლოდ მივესალმებით“, – თქვა წულუკიანმა.
