„ქართული ოცნების” პარლამენტის კომისია, რომელიც „ენმ-ის ხელისუფლების დანაშაულებს იძიებს”, ემზარ კვიციანს უსმენს.
მას კითხვებს 2006 წელს კოდორში განვითარებულ მოვლენებსა და 2008 წლის რუსეთ-საქართველოს ომის შესახებ უსვამენ.
კომისიის დღევანდელ სხდომაზე ასევე დაბარებულები არიან გიორგი კაპანაძე, მარიამ რატიანი, გიორგი თარგამაძე და გიორგი კანდელაკი.
გიორგი თარგამაძემ განაცხადა, რომ სხდომაზე მისვლას არ აპირებს.
კომისიის თავმჯდომარე თეა წულუკიანის თქმით, კანდელაკი და თარგამაძე „ის პირები არიან, რომლებმაც ხმა მისცეს „საქართველოს საწინააღმდეგო რეზოლუციას”.
წულუკიანის თქმით, „თუ დღეს არ მოხერხდა მათი მოსმენა, ახალ თარიღს შესთავაზებენ”.
„მაინც შევეცდებით, რომ მათ მომდევნო დღეებში ან მომდევნო კვირებში მოვუსმინოთ.
გვჭირდება, პირველ რიგში, რეზოლუცია 1633-ზე პასუხი – რატომ დააბრალეს ქართულ ჯარს, რომ თითქოს მათ ჩაიდინეს ომის დანაშაული. მერე ამ ყველაფერმა მე და „ქართული ოცნების“ გუნდს, როცა ქართული ჯარის მუნდირს, ღირსებას და სიმართლეს ვიცავდით ჰააგის სასამართლოში, ამ რეზოლუციის გამო შეგვხვდა არაერთი პრობლემა. ამაზე გვჭირდება პასუხები“, – თქვა წულუკიანმა.
ევროსაბჭოს რეზოლუცია 1633 და მისი მე-5 პუნქტი, რომელზეც „ქართული ოცნება” აპელირებს, საუბრობს არა ომის დაწყებაზე, არამედ ესკალაციის ახალი, სრულმასშტაბიანი საომარი მოქმედებებზე გადასვლის ეტაპზე.
ამ პუნქტის თანახმად, 2008 წლის 7 აგვისტოს, საქართველოს სამხედრო ძალების მიერ ცხინვალის დაბომბვის გაუფრთხილებლად დაწყებით, ესკალაცია ახალ, კერძოდ ღია და სრულმასშტაბიანი საომარი მოქმედებების საფეხურზე გადავიდა.
რეზოლუცია ომის დაწყებაში არცერთ მხარეს არ ადანაშაულებს.
ამასთან, თეა წულუკიანმა დღეს, 31 მარტს კიდევ ერთხელ დააბრალა ენმ-ის ხელისუფლებას 2008 წლის რუსეთ-საქართველოს ომის დროს საქართველოს დანაკარგი.
მისი თქმით, კომისია, რომელიც „ენმ-ის ხელისუფლების დანაშაულებს იძიებს“, „გაარკვევს, მიატოვეს და ვერ მოასწრეს მოსახლეობის გაფრთხილება თუ მიზანმიმართულად ჩატოვა მიხეილ სააკაშვილმა მშვიდობიანი მოსახლეობა საომარი მოქმედებების არეალში“.
„უკვე შეიძლება ჩაითვალოს, რომ სააკაშვილმა, კეზერაშვილმა, მერაბიშვილმა და სხვა თანამდებობის პირებმა ისე აწარმოეს საომარი მოქმედებები, რომ სამხედრო გეგმა არ ჰქონდათ – გეგმა, რომელიც ჩვენმა ღირსეულმა სამხედროებმა შეადგინეს, იქნა გვერდზე გადადებული.
[…]
მათ გაწირეს მშვიდობიანი მოქალაქეები და მიატოვეს […]. რატომ გახადეს რეზერვისტები საზარბაზნე ხორცად, რატომ არ იყო არავითარი გეგმა? რატომ აქციე ჯარი და ჯარისკაცები საზარბაზნე ხორცად – ამას ვეკითხებით მაშინდელ პოლიტიკოსებს.
ასევე, ვსვამთ კითხვას, რატომ არ დაბრუნდა თავის ოჯახთან და შვილებთან გიორგი ანწუხელიძე, რატომ ჩავარდა ის ტყვედ. ეს იყო გარდაუვალი თუ შეიძლებოდა ამის თავიდან აცილება?
გიორგი ანწუხელიძე მარტო არ იყო, იქ იყო უშანგი სოფრომაძე, იქ იყო კახაბერ ხუბულური. რატომ არ დაუბრუნდა უშანგი სოფრომაძე თავის მეუღლესა და შვილებს? ეს არის შეკითხვები – შეიძლებოდა ამის თავიდან აცილება თუ არა?
მიხეილ სააკაშვილმა ჯარი და ის ორი გენერალიც, რომელიც აქ მობრძანდა, თავის სათამაშოდ აქცია.
ჩვენ სააკაშვილის დანაშაულზე ახალ-ახალ ფაქტებს გამოვავლენთ, ჩვენ კეზერაშვილის, მერაბიშვილის და სხვა პოლიტიკური პირების ომის პირობებში თუ საპატიმროში, თუ საკუთრების უფლების მიმართულებით არაერთ დანაშაულებრივ ფაქტს გამოვავლენთ, რაც არ უნდა ქალბატონმა ელენე ხოშტარიამ იკივლოს ქუჩაში.
მით უმეტეს, ირკვევა, რომ 2004 წლიდან სწორედ ელენე ხოშტარია იმ დროს ჩაცმულ-დახურული ხელმძღვანელობდა ქართული ჯარის განადგურების დასაწყისს“.
„დროას“ ლიდერმა, ელენე ხოშტარიამ 29 მარტს განაცხადა, რომ წინა დღეს, დაკავების შემდეგ პოლიციამ მასზე იძალადა – ყბასა და კბილებზე მიაყენეს დაზიანება, შემდეგ კი სრულად გააშიშვლეს და სხეულზე დეტექტორი გადაატარეს. ხოშტარია 28 მარტს დააკავეს აქციაზე, სადაც შეკრებილები თეა წულუკიანის კომისიის მიერ 2008 წლის რუსეთ-საქართველოს ომის „გამოძიებას“ აპროტესტებდნენ.
რაც შეეხება წულუკიანის განცხადებას, რომ „ხოშტარია ხელმძღვანელობდა ქართული ჯარის განადგურების დასაწყისს“ – ის აპელირებს სამხედრო ექიმ ლაშა ქოიავას მიერ 27 მარტს კომისიის სხდომაზე ნათქვამით: „თავდაცვის მინისტრმა, გია ბარამიძემ მოიყვანა მოადგილედ ელენე ხოშტარია და ხოშტარია აქტიურობდა, რომ ყველა, ვინც ომობდა საქართველოსთვის, გაეშვათ ჯარიდან, ვინაიდან ისინი არიან იარაღს და ბრძანებას შეჩვეული და წინააღმდეგ შემთხვევაში შეიძლება შექმნან სამხედრო ფორმირებები”.
