30 მარტს, „ნაციონალური მოძრაობის“ წევრმა, ლევან სანიკიძემ სოციალურ ქსელში დაწერა, რომ მისი ინფორმაციით, „ქართული ოცნების“ პრეზიდენტი ყაველაშვილი „9 მაისს მოსკოვში ჩასვლასა და სამხედრო აღლუმზე პუტინის გვერდით დგომას აპირებს“.
მიხეილ ყაველაშვილის პრესსამსახური გავრცელებულ ინფორმაციას უარყოფს.
„არაფერი მსგავსი არ იგეგმება“, — უთხრეს „პუბლიკას“ ყაველაშვილის პრესსამსახურში.
დღეს „ნაციონალურმა მოძრაობამ“ ბრიფინგი გამართა, სადაც, პარტიის თავმჯდომარე, თინა ბოკუჩავა რუსეთის საგარეო უწყების სპიკერის, მარია ზახაროვას განცხადებას გამოეხმაურა, რომელშიც ზახაროვა ამბობს, რომ არც ადასტურებს და არც უარყოფს ინფორმაციას იმის შესახებ, რომ ყაველაშვილი 9 მაისს რუსეთში მიიწვიეს.
ზახაროვას კომენტარს გამოცემა SOVA ავრცელებს.
ბოკუჩავა ამბობს: „ფაქტი ამყარებს საფუძველს, რომ ვივარაუდოთ, რომ აღნიშნული მოწვევა მიხეილ ყაველაშვილს ნამდვილად აქვს მიღებული“.
„ჩვენს ხელთ არსებულ ინფორმაციასთან ერთად ახლა უკვე რუსეთის საგარეო უწყების ოფიციალური განცხადებით ვერ გამოვრიცხავთ რომ ეს მოწვევა არალეგიტიმურ დე ფაქტო პრეზიდენტ მიხეილ ყაველაშვილს უკვე მიღებული აქვს და რომ ღალატის ქრონიკის კულმინაციად, რომელსაც გასული კვირების განმავლობაში ვუყურებდით ღალატის კომისიაში, სწორედ წითელ მოედანზე, ყაველაშვილის პუტინთან ერთად სამხედრო აღლუმის ჩაბარება იგეგმება“, — თქვა თინა ბოკუჩავამ.
SOVA-ს კითხვის საპასუხოდ, ზახაროვამ თქვა, რომ რუსეთის პრეზიდენტის ადმინისტრაციას დაუკავშირდნენ, თუმცა აღნიშნა, რომ ისინი „ჯერ კომენტარს არ აკეთებენ“.
ასევე, „TV პირველმა“ გაავრცელა ინფორმაცია, რომ საქართველოს ყოფილი გენერალური პროკურორი, ოთარ ფარცხალაძე „9 მაისს მოსკოვში პუტინის გვერდით იქნება და ის ოჯახთან ერთადაა მიწვეული“.
