„ზონალურ-საათობრივი პარკირების სისტემა დედაქალაქის განსაზღვრულ არეალებში დღეიდან ისევ ამოქმედდება და ავტომფლობელებს საათობრივი საფასურის გადახდა უწინდებურად მოუწევთ“, – ამის შესახებ კახა კალაძემ თბილისის მერიაში დღეს მთავრობის სხდომაზე განაცხადა.
დედაქალაქის მერის თქმით, საზოგადოებრივი ტრანსპორტის მოძრაობის აღდგენის პარალელურად, ზონალურ-საათობრივი პარკირება ამოქმედდება იმ ადგილებში, სადაც აღნიშნული სისტემა პანდემიამდეც ფუნქციონირებდა.
„თქვენ იცით, რომ ჩვენ დროებით შეჩერებული გვქონდა გადასახადი და ადამიანებს არ უწევდათ საათობრივი საფასურის გადახდა, იქიდან გამომდინარე, რომ საზოგადოებრივი ტრანსპორტი გაჩერებული გვქონდა. იმის გათვალისწინებით, რომ მუნიციპალურმა ტრანსპორტმა დაიწყო მუშაობა, პარალელურად, ამოქმედდება ზონალურ-საათობრივი პარკირების გადასახადი“, – განაცხადა კალაძემ.
დედაქალაქის მერის თქმით, ზონალურ-საათობრივი პარკირების სისტემა მნიშვნელოვანი პროექტია და საკმაოდ წარმატებით მიმდინარეობს.
„ზონალურ-საათობრივი პარკირების სისტემას ჯერ სრულად არ მოუცავს დედაქალაქი, თუმცა გვაქვს კონკრეტული სივრცეები, ადგილები, მაგალითად, ორბელიანის მოედანი, ბარათაშვილის ქუჩა, კოტე აფხაზის ქუჩა, აბანოთუბანი, პეკინის გამზირი, მისი გადამკვეთი ქუჩების გარკვეული ნაწილით, ასევე, ვაკის რაიონი, სადაც მოქმედებს ზონალურ-საათობრივი პარკირება. დღეიდან ეს სისტემა ისევ ამოქმედდება იმისთვის, რომ დავიცვათ წესრიგი და მაქსიმალურად გავუფრთხილდეთ ერთმანეთს“, – განაცხადა კახა კალაძემ.
