„ის კოორდინაცია, რომელიც თავისი წესებით გუშინ გამოცხადდა, დღეს შედგა“, – ამის შესახებ საქართველოს მეხუთე პრეზიდენტმა, სალომე ზურაბიშვილმა ოპოზიციის წარმომადგენლებთან შეხვედრის დასრულების შემდეგ გამართულ ბრიფინგზე განაცხადა.
ზურაბიშვილი ამბობს, რომ პროევროპულ პარტიებთან ერთად მზად არის, „ქართული ოცნების“ რეპრესიებს წინააღმდეგობა გაუწიოს. მისი თქმით, მიიღეს გადაწყვეტილება, რომ 7 აპრილს ევროსაბჭოში დაგეგმილი სესიისთვის ერთობლივი დოკუმენტი მოამზადონ.
ზურაბიშვილის თქმითვე, დღეს „პოლიტიკურ სპექტრზე კიდევ ერთი შეტევა მიმდინარეობს და პოლიტიკური დევნა ახალ ეტაპზე გადადის“.
„კოორდინაცია დღეს შედგა, ის კოორდინაცია, რომელიც გუშინ იქნა გამოცხადებული, თავისი წესებით, რომ ჩვენ უნდა შევაჯეროთ პოზიციები მთავარ საკითხებზე, რაც დღეს არსებობს ქვეყანაში…
მინდა, გაგაცნოთ ის შეჯერებული პოზიციები, რაც არ გამორიცხავს სხვათა შორის, რომ ინდივიდუალურად პარტიებმა თავიანთი ხედვებიც წარადგინონ შემდეგ სხვანაირად, რაც არ იქნება ერთობლივად შეთანხმებული. ეს არის ასეთი ფორმის კოორდინაცია, რომელიც დღეს იწყებს მუშაობას.
უნდა ითქვას, რომ გუშინდელი პროტესტი ყველას გვაძლევს ძალიან დიდ იმედს და ადასტურებს იმას, რომ ხელისუფლების რეპრესიულმა პოლიტიკამ ვერ შეძლო და ვერ დაშალა ეს პროტესტი. ეს პროტესტი არსებობს საზოგადოებაში და როცა ეძლევა საშუალება, რომ უფრო ძლიერად გამოჩნდეს – გამოჩნდება, მაგრამ არის მუდმივი და არაფერი და ვერავინ აშინებს ამ პროტესტის მონაწილეებს და საზოგადოებას.
დღეს მიმდინარეობს კიდევ ერთი შეტევა პოლიტიკურ სპექტრზე, პოლიტიკური დევნა ახალ ეტაპზეა და ჩვენც ამაზე ვართ შეთანხმებული, ეს უნდა იყოს ჩვენი ერთობლივი პოზიციების ერთ-ერთი მიმართულება. ვნახავთ, როგორი იქნება დღევანდელი ხელისუფლების გადაწყვეტილებების ფორმა, მაგრამ ამითაც პოლიტიკურ სპექტრს ვერ შეაშინებენ.
ჩვენ ასევე ერთობლივად გადავწყვიტეთ, რომ მოვამზადოთ ევროსაბჭოში [დოკუმენტი] 7 აპრილიდან იქნება სესია, სადაც იქნება მიღებული საქართველოზე ალბათ ძალიან მკაცრი რეზოლუცია და სწორედ პოლიტიკური პატიმრების საკითხი იქნება პირველ ადგილას, ასევე ყველა ის ახალი კანონი, რაც მიღებულია ამ დღეებში, რომელიც ცდილობს, რომ ერთი მხრივ „FARA-თი” არასამთავრობო ორგანიზაციები და სამოქალაქო საზოგადოება ჩაახშოს, მაგრამ ამაზეც ვმუშაობთ, რომ ეს გზები იყოს მონახული და ჩვენ არავითარ შემთხვევაში არ ჩავთვალოთ, რომ იმიტომ, რომ ხელისუფლება ყოველდღიურად იღებს ახალ, რეპრესიულ კანონებს, ეს იმის ნიშანი არაა, რომ რამენაირად ძლიერდება, პირიქით, ძლიერდება პროტესტი, უფრო მეტი ხალხი ხვდება, თუ რას აკეთებს ხელისუფლება და რა მიმართულებით მიდის. უფრო მეტი ხალხი უერთდება იმ გზას, რომელიც ასახავს აქ შემოსული პარტიების ერთიან პოზიციას, რომ ჩვენ მივდივართ არჩევნების გზაზე, ჩვენ მივდივართ მშვიდობიან გზაზე, მივაღწევთ არჩევნებსაც, პოლიტპატიმრების გათავისუფლებასაც…“, – განაცხადა სალომე ზურაბიშვილმა.
სალომე ზურაბიშვილმა გუშინ, 31 მარტს, პროტესტის 124-ე დღეს, რუსთაველის გამზირზე შეკრებილებს სიტყვით მიმართა. მან ისაუბრა 31 მარტის მნიშვნელობაზე, ქვეყანაში არსებულ სიტუაციასა და სამომავლო გეგმაზე.
მისი განცხადებით, პროევროპული პოლიტიკური სპექტრის მონაწილეობით შეიქმნება წინააღმდეგობის პლატფორმა.
სალომე ზურაბიშვილის თქმით, პლატფორმის მთავარი პრინციპი ის არის, რომ იგი ღიაა ყველა პროევროპული პარტიისა და ჯგუფისთვის, ვინც პროტესტის მოთხოვნებს იზიარებს.
„მიზნების მისაღწევად წინააღმდეგობის პლატფორმა თანხმდება, რომ შეაჯეროს პოლიტიკური პოზიციები, რათა კოორდინირებულად, ანუ უფრო ეფექტურად, ამხილოს და დაუპირისპირდეს რეჟიმს და მის ქმედებებს. წინააღმდეგობა გაუწიოს და წინ აღუდგეს რეჟიმის მცდელობას გაანადგუროს საქართველოს განვითარების ყველა პერსპექტივა და მისი ევროპული მომავალი.
პლატფორმა მოამზადებს შეთანხმებულ პოლიტიკურ პოზიციებს გასატანად ქვეყნის შიგნით და გარეთ: კოორდინირებული პოლიტიკური პროცესი ნიშნავს იმას, რომ პრეზიდენტის ეგიდით შეიკრიბებიან პლატფორმის მონაწილე სუბიექტები, შეაფასებენ პოლიტიკურ გამოწვევებს, შეაჯერებენ პოზიციებს და შესაძლო ქმედებებს. ამის შესახებ საზოგადოება სრულად და მყისიერად იქნება ინფორმირებული და მჭიდრო კომუნიკაცია დამყარდება სამოქალაქო საზოგადოებასთან და პროტესტის მონაწილე ჯგუფებთან, რათა ერთობლივი სტრატეგია მიღწეული იყოს.
წინააღმდეგობის პლატფორმაში მონაწილე პარტიები თანხმდებიან არჩევნების ახალ დასაწესებელ პირობებზე და ხმების ერთიანად და ეფექტურად დაცვის მექანიზმის აუცილებლობაზე. მზადყოფნა არჩევნებისთვის – მიუხედავად იმისა, როდის დაინიშნება ის – ჩვენი მოვალეობაა. მმართველმა პარტიამ ვერ უნდა შეძლოს და გაატაროს თავისი მორიგი სცენარი, მოულოდნელად დანიშნოს არჩევნები უცვლელი მოცემულობით და გაყალბების შესაძლებლობაც ამით შეინარჩუნოს. ჩვენი პასუხისმგებლობაა დროულად მოვემზადოთ და საზოგადოებასთან და სამოქალაქო სექტორთან ერთად დაუყოვნებლივ შევუდგეთ, დამკვირვებლების მასობრივ გადამზადებას, რათა ერთიანად და ეფექტურად დავიცვათ წინააღმდეგობის ხმები”, – განაცხადა ზურაბიშვილმა.
