აქონდროპლაზიის დიაგნოზის მქონე ბავშვების მშობლები, რომლებიც 10 დღეზე მეტია უწყვეტ საპროტესტო აქციებს მართავენ მინისტრის დღევანდელ განცხადებას პასუხობენ.
მშობლები ამბობენ, რომ უკანასკნელი 14 დღის განმავლობაში, მთავრობის მხრიდან მათთან არცერთი პირი არ გამოსულა პირდაპირ კომუნიკაციაზე.
მინისტრმა დღეს მშობლებს მიმართა და მოუწოდა, რომ პროცესი სამუსაო მაგიდასთან, კონსტრუქციულ რეჟიმში გაგრძელდეს.
„მიუხედავად იმისა, რომ ჩვენ აქამდეც, ახლაც და მომავალშიც, ვაცხადებთ სრულ მზადყოფნას შევხვდეთ სამინისტროს წარმომადგენლებს, მათგან შემოთავაზება არ ყოფილა. აქვე დავაკონკრეტებთ, რომ დიალოგის რეჟიმის პარალელურად, დედების უწყვეტი აქცია გაგრძელდება მთავარი მოთხოვნის – განკარგულების აქტზე პრემიერის ხელმოწერის – შესრულებამდე. მისასალმებელია, ბიუჯეტიდან თანხების გამოყოფილაზე მზაობა.
ეს დიდი ცვლილებაა, რადგან, გვახსოვს ჩვენ, 14 დღის წინ, მშობლებთან შეხვედრის დროს, ქალბატონ თამარ გაბუნიას სიტყვები, როცა დედებს გვითხრა, რომ თანხები არ ჰქონდათ მედიკამენტისთვის. და ბოლოს, გონივრული ვადის (არაუგვიანეს 1-ელი სექტემბრისა) არ არსებობის გარეშე ჩვენთვის საეჭვო დარჩება სამუშაო პროცესის პროდუქტიულობა“,- აცხადებენ მშობლები.
მინისტრი ამბობს, რომ „ხმაურის და დაძაბულობის ფონზე ძალიან ძნელია“ პროცესი გაგრძელდეს. მისივე თქმით, „მხარეები ძალიან ხშირად აღნიშნავენ, რომ ეს პროცესი არ უნდა მიმდინარეობდეს ასეთი პროტესტის ფონზე“, სამინისტრო და დაინტერესებული მხარეები უნდა იყვნენ კონსტრუქციულ ფორმატში.
აზარაშვილის თქმით, ჯანდაცვის სამინისტროს არასდროს უთქვამს უარი აქონდროპლაზიის მკურნალობასთან დაკავშირებით და ასევე არასდროს გაუკეთებიათ აქცენტი იმაზე, რომ დაფინანსებასთან დაკავშირებით რაიმე სახის პრობლემაა.
მინისტრი ამბობს, რომ ჯანდაცვის სამინისტრო კიდევ ერთხელ ადასტურებს სრულ მხარდაჭერას, დააფინანსოს და დააორგანიზოს ამ დიაგნოზის ბავშვების სხვა თანმდევი დაავადებების დიაგნოსტიკა, მკურნალობა, რეაბილიტაცია და ყველა საჭირო პროცედურები როგორც საქართველოში, ისე საზღვარგარეთ.
„მინდა, მშობლებს ვთხოვო, კიდევ ერთხელ და მოვუწოდო, რომ გავაგრძელოთ შეთანხმებები და ყველა ის პროცესი, რომლებიც აუცილებელია ამ იშვიათი დაავადებების მკურნალობისა და მეთოდების ქვეყანაში დასანერგად. გავაგრძელოთ სამინისტროში, სამუშაო მაგიდასთან, ყველა იმ ფორმატში, რომელთა მეშვეობითაც ჩვენ ვცდილობთ, ამ დაავადებას მივხედოთ და პრობლემები მოვაგვაროთ და ის, რაც დღეს და გასული დღეების განმავლობაში ხდება თვითონაც ხედავენ, რომ ეს არანაირად არ წაადგება ამ საქმეს“,- განაცხადა მინისტრმა.
აქონდროპლაზიის მქონე ბავშვთა მშობლები 10 დღეზე მეტია, მთავრობის ადმინისტრაციასთან საპროტესტო აქციას მართავენ. მათი მოთხოვნაა, სახელმწიფომ საქართველოში შემოიტანოს და დააფინანსოს ბავშვებისთვის აუცილებელი პრეპარატი Voxzogo, რომელიც ავტორიზებულია აშშ-ის წამლისა და საკვების ადმინისტრაციის (FDA), ასევე ევროპის წამლის სააგენტოს (EMA) მიერ.
