მოგმართავთ თხოვნით, მიიღოთ გადაწყვეტილება, რომლითაც არ დაისჯება ქართველი ხალხი - გვარამია ევროპელ პოლიტიკოსებს

„მთავარი არხის” გენერალური დირექტორი ნიკა გვარამია პენიტენციური დაწესებულებიდან ევროპარლამენტის პრეზიდენტს, ევროპული კომიისიის პრეზიდენტს, ევროპული საბჭოს პრეზიდენტსა და ევროპარლამენტის წევრებს წერილით მიმართავს და საქართველოსთვის კანდიდატის სტატუსის მინიჭებას სთხოვს:

„ძვირფასო და ნამდვილო მეგობრებო, ჩემი ქვეყნის მთავარო გულშემატკივრებო, საქართველოს ისტროიული სამშობლოს, ევროპის ღირსეულო შვილებო! მოგმართავთ რუსთავის მე-12 პენიტენციური დაწესებულების 212-ე საკნიდან.

მოგმართავთ ჩემი, ჩემი მეუღლის- სოფიას, ჩემი შვილების – სანდროს, ქეთევანის და გიკოს სახეელით, მოგმართავთ ჩემი მეორე ოჯახის – „მთავარი არხის” სახელით, მოგმართავთ ჩემი სამშობლოს ყველა გულმხურვალე პატრიოტის სახელით.

მოგმართავთ უმორჩილესი თხოვნით, რომ მიიღოთ იმგვარი გადაწყვეტილება, რომლითაც არ დაისჯება ჩემი ხალხი – ამაყი და თავისუფალი ქართველები. ცივილიზაციური არჩევანი ჩვენ გაკეთებული გვაქვს – ჩვენი ადგილი მხოლოდ ევროპაშია, იქ, სადაც ინახება ჩვენი უძველესი და საკაცობრიო სიმბოლო – ოქროს საწმისი.

როგორი უნდა იყოს გადაწყვეტილება, თქვენ უკვეთ იცით. მე მხოლოდ ის მინდა გთხოვოთ, რომ საქართველოს ხალხს არ დაეკეტოს გზა ევროპისკენ. არ დაეკეტოს, რადგან ალტერნატივა მხოლოდ რუსეთია. ეს ალტერნატივა კი დამღუპველი იქნება ჩვენთვის და დაასრულებს დამოუკიდებელ საქართველოს ისტორიას.

და ბოლოს, უფლება არ მაქვს, როგორც საქართველოს პატრიოტმა და როგორც ადვოკატმა, არ გთხოვოთ, მაქსიმალური ძალისხმევა გასწიოთ მიხეილ სააკაშვილის გადასარჩენად. ქვეყანაში დასავლეთის ყველაზე დიდ გულშემატკივარს, საქართველოს მესამე პრეზიდენტს, სამწუხაროდ, დიდი დრო აღარ აქვს, თუ მისი გადარჩენა სასწრაფოდ არ მოხდა”, – წერს გვარამია facebook-პოსტში.