პარტია „გირჩი“ განცხადებას ავრცელებს და მოუწოდებს „ქართულ ოცნებას“, 2 თებერვლის პლენარულ სხდომაზე არ მიიღოს ოპოზიციის წევრი დეპუტატების უფლებამოსილების ვადაზე ადრე შეწყვეტის მოთხოვნის დაკმაყოფილების გადაწყვეტილება.
„გირჩი“ წერს, რომ მოლაპარაკების პროცესს ეს აზრს დაუკარგავს და კრიზისს გააღრმავებს. მათი თქმით, თუ „ოცნება“ მაინც შეუწყვეტს უფლებამოსილებას ოპოზიციონერ დეპუტატებს, მაშინ იაგო ხვიჩია, ვახტანგ მეგრელიშვილი და ალექსანდრე რაქვიაშვილიც დაწერენ განცხადებას სადეპუტატო უფლებამოსილების ვადაზე ადრე შეწყვეტის შესახებ.
„ხვალ „ქართული ოცნება“ განიხილავს ოპოზიციური პარტიებიდან არჩეული 51 პარლამენტარის უფლებამოსილების შეწყვეტის საკითხს. პარალელურად, მეგობარი ელჩების შუამავლობით მიმდინარეობს მოლაპარაკების პროცესი და არც ერთი მხარე საჯაროდ არ გამოთქვამს მოლაპარაკების შეწყვეტის სურვილს და არც იღებს პასუხისმგებლობას ჩაშლაზე.
„ქართული ოცნება“, როგორც მმართველი პარტია, არის მთავარი პასუხისმგებელი საკამათო არჩევნების ჩატარებაზე და ლოგიკურია, რომ მას ეკისრება მომეტებული პასუხისმგებლობა შედეგად განვითარებული პოლიტიკური კრიზისის განმუხტვაზეც.
ჩვენი აზრით, კოლეგებისთვის უფლებამოსილების შეწყვეტა მოლაპარაკების პროცესს აზრს დაუკარგავს, კრიზისს გააღრმავებს და შესაძლოა, შეუქცევადი გახადოს.
ზემოთ თქმულის გათვალისწინებით, გვინდა ვთხოვოთ ჩვენს კოლეგებს „ქართული ოცნებიდან“, საქმით აჩვენონ თანამშრომლობის სურვილი. ნუ დაუჭერენ მხარს, საკუთარი კოლეგების პარლამენტიდან გაძევებას. გადადონ ამ გადაწყვეტილების მიღება და დატოვონ დრო დისკუსიისათვის, რათა პარლამენტის წევრებმა და მათმა ამომრჩეველმა გაიაზრონ შეთანხმების მნიშვნელობა და შეუთანხმებლობის რისკები, ხოლო საბოლოო მოლაპარაკების რაუნდის წინ ამ რისკების გააზრებით მივიდეთ.
თუ მიუხედავად ჩვენი გულწრფელი თხოვნისა, „ქართული ოცნება“ მაინც შეუწყვეტს კოლეგებს უფლებამოსილებას, ამას მივიღებთ ქართული ოცნების მხრიდან მთელ ოპოზიციასთან მოლაპარაკების შეწყვეტის გააზრებულ გადაწყვეტილებად და გირჩის მოქმედი პარლამენტის წევრებიც დაუყოვნებლივ ჩააბარებენ უფლებამოსილების შეწყვეტის შესახებ განცხადებებს“, – ნათქვამია განცხადებაში.
51 ოპოზიციონერი დეპუტატის უფლებამოსილების ვადაზე ადრე შეწყვეტას პარლამენტის საპროცედურო და წესების კომიტეტმა მხარი უკვე დაუჭირა.
პლენარული სესია, რომელზეც ეს საკითხი კენჭისყრაზე გავა, ხვალ, 2 თებერვალს არის ჩანიშნული.
