ჰაკერების ქსელმა რამდენიმე რუსული სამთავრობო ვებსაიტი გათიშა, მათ შორის, პროპაგანდისტული მედიაორგანიზაცია Russia Today-ს ვებსაიტი.
ჰაკერების ქსელი Anonymous-ის სახელით არის ცნობილი და ერთობლივი კიბერთავდასხმებით მწყობრიდან გამოიყვანეს რუსეთის მთავრობისა და თავდაცვის სამინისტროს ვებსაიტები.
„ჩვენი კოლექტივი ოფიციალურად ჩაერთო კიბერომში რუსეთის მთავრობის წინააღმდეგ“, – აცხადებენ ჰაკერი აქტივისტები.
Russia Today კიბერთავდასხმის ფაქტს ადასტურებს და აცხადებს, რომ ორგანიზაციის ზოგიერთი ვებსაიტი შეფერხებით მუშაობს, ნაწილი კი გათიშულია.
Russia Today-ს უკრაინაში მიმდინარე მოვლენებს მხოლოდ პრორუსული პერსპექტივიდან აშუქებდა. ავსტრალიური ABC-ს ცნობით, სამთავრობო მედია მაყურებელს უჩვენებდა ზეიმსა და ფოიერვერკებს ოკუპირებული ტერიტორიებიდან.
ბრიტანეთში დეპუტატებმა აღნიშნეს, რომ ტელეარხი ვლადიმერ პუტინის „პირადი პროპაგანდის იარაღია“, ამიტომ მისი მაუწყებლობა უნდა აიკრძალოს.
