სავალდებულო სამხედრო სამსახურის წინააღმდეგ მოქალაქეები რუსთაველის გამზირზე შეიკრიბნენ. აქცია პარტია „გირჩის“ მიერ არის დაორგანიზებული. აქციის მონაწილეები „თავდაცვის კოდექსში“ შესატან ცვლილებებს აპროტესტებენ.
„ჯარში მხოლოდ ის უნდა მიდიოდეს, ვინც ჯარისკაცობაზე ოცნებობს. იძულებით ჯარში გაწვევა – მონობაა. ჩვენი მოთხოვნაა – დასრულდეს სავალდებულო გაწვევა, ” – ამბობენ ორგანიზატორები.
პარტია „გირჩის“ ერთ-ერთი წევრი, დეპუტატი სანდრო რაქვიაშვილი ჟურნალისტებთან ამბობს, რომ მათი მთავარი მოთხოვნაა – ჯარი იყოს ნებაყოფლობითი.
„ვითხოვთ, ჯარი იყოს ნებაყოფლობითი, რომ არავინ არ გაიწვიონ მისი სურვილის საწინააღმდეგოდ. თუ მთავრობა ამბობს, რომ პატრიოტია, ფიქრობს მოსახლეობაზე, თავდაცვისუნარიანობაზე, ჯარზე, ერთ-ერთი რამ რაც მისი მოვალეობაა – შექმნას სათანადო პირობები ჯარში, გადაუხადოს ღირსეული ხელფასი და მაშინ ხალხი ნებაყოფლობით წავა ჯარში”, – ამბობს ის.
პარლამენტში საქართველოს თავდაცვის სამინისტროს მიერ მომზადებული „თავდაცვის კოდექსის“ განხილვა მიმდინარეობს. საკანონმდებლო პაკეტი მთელ რიგ სიახლეს ითვალისწინებს.
თავდაცვის სამინისტროს ცნობით, ახალი „თავდაცვის კოდექსით“:
- იცვლება სავალდებულო სამხედრო სამსახურის ნაკლოვანი სისტემა;
- ძლიერდება ჯარის სოციალური გარანტიები;
- იქმნება რეზერვის მყარი საფუძველი, რაც მნიშვნელოვანია ქვეყნის
თავდაცვისუნარიანობისთვის.
ასევე, ახალი კოდექსით:
- ყველა წვევამდელი შეასრულებს მხოლოდ სამხედრო ფუნქციას და იმსახურებს თავდაცვის ძალებში;
- ნაცვლად მუნიციპალიტეტებისა, გაწვევის ორგანიზებას და ნატოს სტანდარტებით წვრთნას განახორციელებს მხოლოდ თავდაცვის სამინისტრო;
- ყველა წვევამდელი გაივლის ძირითად საწყის საბრძოლო მომზადებას (BCT) და შემდგომ წვრთნებს;
- არსებული 12-თვიანი სავალდებულო სამსახურის ვადა მნიშვნელოვნად მცირდება.
ახალი კოდექსით, სტუდენტებს, მხოლოდ მათი სურვილის შემთხვევაში, არდადეგების პერიოდში ან უქმე დღეების ხარჯზე, წვევამდელთა ეროვნული სამხედრო სამსახური მოხდილად ჩაეთვლებათ:
- თუ სამხედრო წვრთნას გაივლიან ყოველწლიურად, ზაფხულში 1 თვის განმავლობაში, მომდევნო 4 წელი;
- ან გაივლიან 2-წლიან უმცროს ოფიცერთა მომზადების პროგრამას ისე, რომ ხელი არ შეეშლებათ განათლების მიღებაში, ხოლო სწავლის დასრულებისა და ხარისხის მიღების შემთხვევაში, მიენიჭებათ ლეიტენანტის სამხედრო წოდება, აკადემიური ხარისხის ვერ მიღების შემთხვევაში კი – სერჟანტის წოდება;
- ან გარკვეული კრიტერიუმების შესაბამისად, ჩაირიცხებიან უკვე მოქმედ ანაზღაურებად ტერიტორიულ რეზერვში და იმსახურებენ 4 წლის განმავლობაში წელიწადში 45 დღე, რომლის სამი წლის ამოწურვის შემდგომ, წვევამდელთა ეროვნული სამსახური მოხდილად ჩაეთვლებათ.
- აღნიშნული პირობებით სარგებლობის საშუალება ექნებათ ასევე უმაღლესი განათლების მქონე წვევამდელებს.
ახალი კოდექსით იცვლება გადავადების პირობები:
- აღმოიფხვრება საკანონმდებლო ხარვეზი და გამოირიცხება ფიქტიური „რელიგიური ორგანიზაციების“ არაკეთილსინდისიერი გამოყენება ჯარის თავიდან არიდების მიზნით.
ახალი კოდექსით უმჯობესდება სამხედროების სოციალური გარანტიები მრავალწლიანი სამსახურის დაფასების მიზნით:
- თავდაცვის სამინისტრო ვალდებული იქნება სამხედროთა გარკვეული კატეგორიისთვის, ყოველ სამ წელიწადში ერთხელ, თანადაფინანსებით, უზრუნველყოს საცხოვრებელი ფართების (ბინების) მშენებლობა;
- სამხედროები უზრუნველყოფილი არიან უმაღლესი ხარისხის სამხედრო აღჭურვილობით, საცხოვრებელი პირობებით, კვებით, სამედიცინო დაზღვევით და გაუმჯობესებული სოციალური პირობებით.
