აშშ-ის ალერგიისა და ინფექციური დაავადებების ეროვნული ინსტიტუტის ხელმძღვანელი, ენტონი ფაუჩი აცხადებს, რომ, შესაძლოა, აშშ-ში COVID-19-ის ვაქცინა დეკემბერში შეიტანონ, თუკი მისი „საიმედოობა და ეფექტიანობა“ დადასტურდება. ფაუჩი აცხადებს, რომ ვაქცინაზე მომუშავე კომპანია Pfizer-ს ენდობა და თუ მის მიერ დამზადებულ ვაქცინას საკვებისა და წამლის ადმინისტრაცია მწვანე შუქს აუნთებს, მზად არის, ვაქცინა თავადაც მიიღოს.
ფაუჩიმ MSNBC-თან განაცხადა, რომ კორონავირუსის საცდელი ვაქცინის ეფეტიანობა „შთამბეჭდავია“. მისი თქმით, თუ ვაქცინის საცდელი პროცესი წარმატებით გაგრძელდება, უკვე დეკემბერში შესაძლებელი იქნება მისი პირველი დოზების პრიორიტეტული ჯგუფებისთვის განაწილება (მაგალითად, სამედიცინო პერსონალისთვის).
აშშ-ის ჯანდაცვის მდივანი ალექს აზარი CBN-თან ამბობს, რომ „მარტის ბოლოს, აპრილის დასაწყისისთვის ელიან იმდენი ვაქცინის მიღებას, რომ ამერიკაში ყველა მსრუვლეს მიუწვდებოდეს ხელი“.
ჯანდაცვის მსოფლიო ორგანიზაციის დირექტორი, ტედროს ადანომ გებრეისუსი ვარაუდობს, რომ COVID-19-ის ვაქცინა წლის ბოლოსთვის იქნება და რომ Pfizer-ის საცდელი ვაქცინა დამაიმედებლად გამოიყურება.
რა ეტაპზეა Pfizer/BioNTech-ის ვაქცინა?
Pfizer/BioNTech-ის კორონავირუსის ვაქცინის შუალედური ანალიზის შედეგებმა ექსპერტთა მოლოდინს გადააჭარბა. მწარმოებელი კომპანიების განცხადებით, პირველმა შუალედურმა შედეგმა აჩვენა, რომ საცდელი ვაქცინა 90%-ით ეფექტიანია.
The Guardian-ის ინფორმაციით, ტესტირება გაგრძელდება, სანამ ვაქცინის ეფექტიანობის 164 შემთხვევა არ გამოვლინდება. გამოცემის ცნობით, ტესტირებაში 43 ათასზე მეტი ადამიანია ჩართული.კომპანიის განცხადებით, სერიოზული გვერდითი ეფექტი არ გამოვლენილა. რეგულაციის თანახმად კი, ფართო მოხმარებისთვის ლიცენზირებული ვაქცინა დადებით შედეგს, მინიმუმ, 50% შემთხვევაში მაინც უნდა ავლენდეს. კომპანიის განცხადებით, უსაფრთხოების შესახებ მონაცემთა შეგროვება ნოემბრის მესამე კვირაში დაიწყება, შემდგომ კი მარეგულირებლებს გაეგზავნება. დაჩქარებული ლიცენზირების პირობებში კი, შესაძლოა, პირველი დოზა სამედიცინო პერსონალმა წლის ბოლოს მიიღოს.
