20 ივნისის საქმეზე ბრალდებული ბესიკ თამლიანი „სისხლის სამართლის კოდექსით“ გათვალისწინებული მუხლითაა დაკავებული.
თამლიანი გუშინ სასამართლოს წინ, მესამე პრეზიდენტის მიხეილ სააკაშვილის მხარდამჭერ საპროტესტო აქციაზე დააკავეს.
როგორც „პუბლიკას“ შინაგან საქმეთა სამინისტროში განუცხადეს, თამლიანის წინააღმდეგ ძიება „სისხლის სამართლის კოდექსის“ 353-ე მუხლის პირველი ნაწილით დაიწყო, რაც პოლიციისადმი წინააღმდეგობის გაწევას გულისხმობს.
დანაშაული ისჯება ჯარიმით ან შინაპატიმრობით ვადით ექვსი თვიდან ორ წლამდე, ან თავისუფლების აღკვეთით ვადით ორიდან ხუთ წლამდე.
გუშინ, სასამართლოსთან მიმდინარე აქციაზე 15 პირი დააკავეს ადმინისტრაციული წესით.
სამართალდამცველებმა ბესიკ თამლიანი 20-21 ივნისის საქმეზე 4 ივლისს კიდევ სამ პირთან ერთად დააკავეს. მას ბრალად ედებოდა ჯგუფურ ძალადობაში მონაწილეობა/ორგანიზებაში, სისხლის სამართლის კოდექსის 225-ე მუხლით. თამლიანი პატიმრობიდან 2020 წლის 23 მარტს გაათავისუფლეს.
