ბულგარეთში 25 ოქტომბერს გამართული საპრეზიდენტო არჩევნების პირველი ტურის შემდეგ მეორე ტური დაინიშნა. პრეზიდენტობის ვერცერთმა კანდიდატმა ხმების საჭირო უმრავლესობა ვერ მიიღო. ხელახალი კენჭისყრა 1 ნოემბერს გაიმართება.
Reuters-ისა და საერთაშორისო მედიის ცნობით, ეგზიტპოლების შედეგებით, პირველ ადგილზე მოქმედი პრეზიდენტი ილიანა იოტოვა გავიდა, რომელსაც პრემიერ-მინისტრ რუმენ რადევის პოლიტიკური ძალა უჭერს მხარს. მეორე ადგილზე ყოფილი დროებითი პრემიერ-მინისტრი ანდრეი გიუროვია, რომელსაც პროევროპული ოპოზიცია უჭერს მხარს. არჩევნებში 27 კანდიდატი მონაწილეობდა.
სხვადასხვა ეგზიტპოლის მიხედვით, იოტოვას მხარდაჭერა 35-36.5%-ის ფარგლებში იყო, გიუროვის კი – 31-33.5%.
Reuters-ის ცნობით, არჩევნების კამპანიის ერთ-ერთი მთავარი საკითხი რუსეთის ომი უკრაინაში და ბულგარეთის საგარეო პოლიტიკური კურსია.
ანდრეი გიუროვი უკრაინის მხარდაჭერას ემხრობა. დროებითი პრემიერ-მინისტრის თანამდებობაზე ყოფნისას მან უკრაინასთან უსაფრთხოების სფეროში თანამშრომლობის შეთანხმებას მოაწერა ხელი. მას მხარს უჭერენ პროევროპული და რეფორმისტული პოლიტიკური ძალები.
ილიანა იოტოვა კი რუსეთის წინააღმდეგ ომის გაგრძელების ნაცვლად დიპლომატიური გზით მოგვარების მომხრეა. მას მხარს უჭერს პრემიერ-მინისტრი რუმენ რადევი, რომლის პოლიტიკურ ძალასაც აპრილში გამართულ საპარლამენტო არჩევნებში მნიშვნელოვანი გამარჯვება ჰქონდა.
საარჩევნო კამპანიისას ყურადღების ცენტრში შავ ზღვაში სავაჭრო გემებზე დრონებით თავდასხმებიც მოექცა. Reuters-ის ინფორმაციით, თავდასხმების შედეგად, სავარაუდოდ, ორი ათეული საერთაშორისო მეზღვაური დაიღუპა. ბულგარეთს რუსეთი თავდასხმების ორგანიზებაში პირდაპირ არ დაუდანაშაულებია, თუმცა რუმენ რადევმა განაცხადა, რომ ამ მოვლენებით რუსეთის ფედერაცია სარგებლობს.
ბულგარეთი ევროკავშირისა და NATO-ს წევრია. პრეზიდენტის უფლებამოსილება ძირითადად წარმომადგენლობითია, თუმცა მას შეიარაღებული ძალების ხელმძღვანელის ფუნქციაც აქვს, შეუძლია კანონებზე ვეტოს დადება და საერთაშორისო ხელშეკრულებების ხელმოწერა.
