„დააგემოვნე თბილისის ქუჩებში“, საცეცხლე კასრები და სანტას კომპლექსი – მერიის ტენდერები

ნაძვის ხის ანთების ცერემონიის დეკორაცია, საციგურაო მოედანი, მუსიკალური სცენა, სანტას კომპლექსი, საშობაო ბაზარი, საცეცხლე კასრები და სხვა – თბილისის მერიამ საახალწლო ღონისძიებებისთვის სახელმწიფო შესყიდვის გამოცხადება უკვე დაიწყო.

საახალწლოდ რის შესყიდვას აპირებს მერია და რა ფასად? – ბოლო ერთი თვის განმავლობაში გამოცხადებული ტენდერები

უშუალოდ საახალწლო საჭიროებებისა და ღონისძიებებისთვის მერიამ ბოლო ერთი თვის განმავლობაში დაახლოებით 2 353 651 ლარის ტენდერი გამოაცხადა.

„პუბლიკა“ გთავაზობთ გამოცხადებული ტენდერების შესახებ ინფორმაციას (მოცემულია შესყიდვის სავარაუდო ღირებულება):

• ცენტრალური ნაძვის ხის ანთების ცერემონიის დეკორაციისთვის – შესყიდვის სავარაუდო ღირებულება – 43 500 ლარი.
• ახალი წლის დღესასწაულის აღნიშვნისთვის სასცენო დეკორაციით მომსახურება – 45 000-ლარიანი ტენდერი;
• საახალწლო ღონისძიებებისთვის ლითონის კონსტრუქციის ფორმებით აწყობილი თაღის შესყიდვისთვის –  16 000-ლარიანი ტენდერი.
• გარე გამოყენების (Outdoor) ეკრანით მომსახურების სახელმწიფო შესყიდვა – 157 200 ლარი.
• 2 მუსიკალური სცენით (მონტაჟი/ექსპლუატაცია/დემონტაჟი) მომსახურების შესყიდვა – 159 925 ლარი.
• ე.წ. სანტას კომპლექსის გაკეთება და მომსახურების შესყიდვა – 258 026 ლარი;
• ტენდერი საცეცხლე კასრების შესასყიდად – მერია 40 ცალის შეძენას აპირებს  6 000 ლარად. სატენდერო დოკუმენტაციის მიხედვით, კასრზე ამოჭრილი უნდა იყოს არანაკლებ 15 ვარსკვლავი;
• ღინისძიებებისთვის წრიული ფორმის სასცენო გადახურვით მომსახურებისთვის – შესყიდვის სავარაუდო ღირებულება 120 000 ლარი;
• პროექტის „დააგემოვნე თბილისის ქუჩებში“ ორგანიზებისთვის – შესყიდვის სავარაუდო ღირებულება 78 000 ლარი იქნება.
• სხვადასხვა ტიპის სცენები, პოდიუმები, მრავალდონიანი ტრიბუნები და სცენის ბექგრაუნდისთვის კონსტრუქციები –  683 000 ლარი.
• პროექტის „თბილისის საშობაო ბაზრის“ ორგანიზებისთვის – 378 000 ლარი;
• თბილისის მერიის საკუთრებაში არსებული საახალხო ინვენტარის აღდგენა–რესტავრაციისა და მონტაჟი–დემონტაჟის მომსახურების შესყიდვა – 57 000 ლარი;
• ასაწყობი ტიპის სცენებით და „D“ ტიპის სასცენო გადახურვებით მომსახურების შესყიდვა – სავარაუდო ღირებულება 54 000 ლარი.
• საციგურაო (სინთეტიკური ყინული) მოედნით მომსახურება – 55 000 ლარია.
• ასაწყობი ტიპის მინის სცენებით მომსახურების შესყიდვა – ღირებულება – 143 000 ლარი.
• „დიდი კონცერტის“ პროფესიონალური გახმოვანების საკონცერტო აპარატურით მომსახურების შესყიდვა – 100 000 ლარი.