მასალა განახლებულია
ევროკავშირი რუსეთის მიმართ სანქციების 21-ე პაკეტზე შეთანხმდა.
მათ შორის, სანქციები დაუწესდა საქართველოში მოქმედ კრიპტოკომპანიებს, ასევე ყულევის ნავთობგადამამუშავებელ ქარხანას, რომელთან ტრანზაქციების აკრძალვაც ძალაში 6 თვეში შევა.
უმაღლესმა წარმომადგენელმა საგარეო და უსაფრთხოების საკითხებში, კაია კალასმა თქვა:
„ჩვენ შევთანხმდით რუსეთის წინააღმდეგ სანქციების 21-ე პაკეტზე. ის მოიცავს ფართომასშტაბიან ზომებს, რომლებიც მიმართულია მოსკოვის ფინანსური სისტემის, სამხედრო-სამრეწველო კომპლექსისა და ენერგეტიკის სექტორის წინააღმდეგ – იმ სფეროების წინააღმდეგ, რომლებიც რუსეთის საომარ ეკონომიკას ამუშავებს.
ჩვენ პუტინს ყველაზე მტკივნეულ ადგილას ვურტყამთ: ვუზღუდავთ იმ ფინანსურ რესურსებს, რომლებზეც ის ეყრდნობა ომის გასაგრძელებლად.
ეს სანქციების გზაზე ბოლო ნაბიჯი არ არის. ჩვენ უკვე ვმუშაობთ შემდგომ ზომებზე. ევროკავშირი მზად უნდა იყოს რუსეთის მხრიდან ნებისმიერი შემდგომი ესკალაციისთვის პასუხის გასაცემად“.
ევროკომისიის განცხადებით, ეს სანქციების ყველაზე მაშტაბური პაკეტია: სანქციების სიაში შეიყვანეს 218 სუბიექტი, მათ შორის 48 ფიზიკური პირი და 170 იურიდიული პირი.
ევროკავშირი აცხადებს, რომ სანქციების 21-ე პაკეტის მიზანია, კიდევ უფრო შეასუსტოს რუსეთის ეკონომიკა და სამხედრო მანქანა.
„სანქციები მოჰყვა რუსეთის მიერ განხორციელებულ სასტიკ სამხედრო დარტყმებს, რომლებიც განზრახ იყო მიმართული სამოქალაქო ინფრასტრუქტურის წინააღმდეგ, მათ შორის ენერგეტიკის, წყალმომარაგების, ჯანდაცვის ობიექტების, კულტურული და რელიგიური ძეგლების წინააღმდეგ, რამაც მშვიდობიან მოსახლეობას მძიმე ზიანი მიაყენა.
ევროკავშირი მტკიცედ არის განწყობილი, შეინარჩუნოს და კიდევ უფრო გაზარდოს ზეწოლა რუსეთზე, რათა მან შეწყვიტოს თავისი სასტიკი აგრესიული ომი და ჩაერთოს რეალურ მოლაპარაკებებში სამართლიანი და მდგრადი მშვიდობის მისაღწევად“, – აცხადებს ევროკავშირი.
კაია კალასის თქმით, სანქციებს უწესდება 100-ზე მეტ ბანკსა და კრიპტოვალუტის სფეროში მოქმედ ოპერატორს, რუსეთის „ჩრდილოვანი ფლოტის“ 40-ზე მეტ გემს, ასევე რუსეთისა და ბელარუსის რამდენიმე ნავთობგადამამუშავებელ ქარხანას.
სიაში ასევე შევიდა 50-ზე მეტი სამხედრო-სამრეწველო სუბიექტი, მათ შორის რუსეთის შორი მოქმედების დრონების წარმოებაში ჩართული მნიშვნელოვანი მონაწილეები.
ზეწოლის გამკაცრება საფინანსო სექტორსა და კრიპტოვალუტებზე
ევროკავშირმა აქტივები გაუყინა და ფინანსური რესურსების ხელმისაწვდომობა აუკრძალა 94 ბანკსა და მსხვილ საფინანსო ინსტიტუტს, ასევე რუსეთის საბანკო სისტემის ერთ-ერთ მნიშვნელოვან ფიგურას.
გარდა ამისა:
ტრანზაქციების აკრძალვა გავრცელდა კიდევ 33 რუსულ საკრედიტო და საფინანსო დაწესებულებაზე;
სანქციები დაუწესდა ერთ ყირგიზულ ბანკს, რომელიც დაკავშირებულია SPFS-ის (რუსული ფინანსური შეტყობინებების სისტემა) გამოყენებასთან;
ასევე სამ სხვა არარუსულ ბანკს, რომლებიც სანქციების გვერდის ავლაში მონაწილეობდნენ.
ევროკავშირმა სანქციების სიაში შეიყვანა A7-ის საერთაშორისო ქსელთან დაკავშირებული ოთხი სუბიექტი, მათ შორის აფრიკაში არსებული ახალი კავშირები.
ტრანზაქციების აკრძალვა გავრცელდა 14 კრიპტოაქტივებთან დაკავშირებულ პლატფორმაზე, რომლებიც დაფუძნებულია საქართველოში, პანამაში, არაბთა გაერთიანებულ საამიროებში, მარშალის კუნძულებზე, ყირგიზეთსა და ბელარუსში.
ზეწოლა რუსეთის ენერგეტიკულ შემოსავლებზე
ევროკავშირი წერს, რომ ენერგეტიკის სფეროში ევროკავშირმა 2027 წლის 15 ივლისამდე შეაჩერა ნავთობის ფასის ზედა ზღვრის ავტომატური კორექტირების მექანიზმი, რათა ჰორმუზის სრუტის დახურვით გამოწვეული ბაზრის არასტაბილურობის მიუხედავად, რუსეთის ნავთობიდან მიღებული შემოსავლები კვლავ შეზღუდული დარჩეს.
გაძლიერდა ბრძოლა “ჩრდილოვანი ფლოტის“ წინააღმდეგ:
- სანქციები დაემატა კიდევ 41 გემს, რის შედეგადაც სანქცირებული გემების საერთო რაოდენობამ 673 შეადგინა;
- სანქციები გავრცელდა კომპანიებსა და პირებზე, რომლებიც ჩრდილოვან ფლოტს საწვავითა და სხვა მომსახურებით უზრუნველყოფენ;
- პირველად სანქციები შეეხო ეკიპაჟების დამქირავებელ სააგენტოსაც.
ნავთობის სექტორი
ევროკავშირმა სანქციები დაუწესა:
- 18 კომპანიასა და ერთ ფიზიკურ პირს;
- რუსეთის სამ ნავთობგადამამუშავებელ ქარხანას;
- ბელარუსის ერთ-ერთ უმსხვილეს ნავთობგადამამუშავებელ ქარხანას;
- კომპანიას, რომელიც ბელარუსულ ნავთობპროდუქტებს რუსეთში ყიდის.
ასევე:
შესაძლებელი გახდა სანქციების დაწესება მესამე ქვეყნებში მდებარე ქარხნებზეც, რომლებიც რუსულ ნავთობს ამუშავებენ;
- ექვსი თვის შემდეგ ამოქმედდება ტრანზაქციების აკრძალვა საქართველოს ქალაქ ყულევში მდებარე ნავთობგადამამუშავებელ საწარმოსთან, რომელიც რუსულ ნავთობს ამუშავებს და ყიდის;
- სანქციები დაემატა კიდევ ხუთ ნავთობით მოვაჭრე კომპანიას.
კრიტიკული ინფრასტრუქტურა
- ევროკავშირმა სანქციები დაუწესა:
- საერთაშორისო ენერგომომარაგების ერთ-ერთ მნიშვნელოვან რუსულ ოპერატორს;
- რუსეთის რკინიგზის ერთ-ერთ ხელმძღვანელ პირს;
- ტრანზაქციების აკრძალვა გავრცელდა ორ რუსულ პორტსა და ოთხ აეროპორტზე.
თხევადი გაზი (LNG)
შემოღებულია:
- LNG ტანკერების გაყიდვის შესახებ სავალდებულო შეტყობინების მოთხოვნა;
- შესაძლებლობა, მომავალში აიკრძალოს LNG ტანკერების მიყიდვა რუსეთის მოქალაქეებსა და კომპანიებს;
- დამატებითი სახელშეკრულებო მოთხოვნები, რათა შემცირდეს რუსეთში გადაყიდვის რისკი.
ოქრო, ბრილიანტები და სამთო მრეწველობა
სანქციები შეეხო:
- ოქროს სექტორში მოქმედ შვიდ მსხვილ კომპანიასა და პირს;
- ერთ-ერთ უმსხვილეს ბრილიანტების კომპანიას;
- სამთო და მეტალურგიულ სექტორში მოქმედ რამდენიმე ორგანიზაციას.
რუსეთის სამხედრო-სამრეწველო კომპლექსი
რუსეთის სამხედრო შესაძლებლობების, განსაკუთრებით შორი მოქმედების დრონების წარმოების შესაზღუდად:
- სანქციები დაუწესდა 56 პირსა და კომპანიას;
- მათგან 37 პირდაპირ დაკავშირებულია შორი მოქმედების დრონების წარმოებასა და მიწოდების ჯაჭვთან.
გარდა ამისა, 51 ახალი კომპანია დაემატა იმ სუბიექტების სიას, რომელთაც ორმაგი დანიშნულების საქონელსა და ტექნოლოგიებზე გამკაცრებული საექსპორტო შეზღუდვები ეხებათ.
მათ შორის არიან კომპანიები:
- ჩინეთიდან (ჰონგ-კონგის ჩათვლით);
- ინდოეთიდან;
- ყაზახეთიდან;
- ყირგიზეთიდან;
- თურქეთიდან;
- არაბთა გაერთიანებული საამიროებიდან.
რუსი სამხედროებისათვის ევროკავშირში შესვლის აკრძალვა
პაკეტი ქმნის სამართლებრივ საფუძველს, რომ რუსეთის შეიარაღებული ძალებისა და სხვა პრორუსული შეიარაღებული დაჯგუფებების მოქმედ და ყოფილ მებრძოლებს ევროკავშირში ვიზების გაცემა სრულად აეკრძალოთ. გადაწყვეტილება ძალაში შესვლის თარიღის შესახებ მოგვიანებით იქნება მიღებული.
ვაჭრობა
ევროკავშირმა გააფართოვა ექსპორტის აკრძალვა და მასში შეიტანა:
- ნიკელის ფხვნილები;
- ბერილიუმის ფხვნილები;
- სპეციალური ლითონები და შენადნობები;
- თვითწებვადი მასალები აეროკოსმოსური და თავდაცვის ინდუსტრიისთვის;
- უპილოტო საფრენი აპარატების (დრონების) სპეციფიკური მოწყობილობები.
იმპორტის მხრივ დაწესდა ახალი შეზღუდვები რუსეთისთვის მნიშვნელოვანი შემოსავლის მომტან პროდუქტებზე, რომელთა ღირებულება 60 მილიონ ევროზე მეტია, მათ შორის:
- სპილენძის, ნიკელისა და ტყვიის მადნები;
- ძვირფასი ლითონების მადნები;
- დაუმუშავებელი თუთია;
- ტუტემიწა ლითონები;
- თუთიისა და ქრომის ოქსიდები;
- მინის ნაწარმი;
- ხელოვნური მარგალიტი;
- ავტომობილების ნაწილები.
ბელარუსი
პაკეტი ასევე მოიცავს ბელარუსის მიმართ რუსეთის მსგავსი სანქციების გავრცელებას, მათ შორის:
- სავაჭრო შეზღუდვებს;
- სამხედრო ინდუსტრიასთან დაკავშირებულ ექსპორტის აკრძალვებს;
- ევროკავშირის ოპერატორების დამატებით სამართლებრივ დაცვას.
- რუსეთის ომის პროპაგანდა
- სანქციები დაუწესდა რვა პირს, რომლებიც ავრცელებენ რუსეთის სამხედრო პროპაგანდას და ხელს უწყობენ უკრაინის შესახებ მანიპულაციური ნარატივების გავრცელებას.
ომის დანაშაულები
ევროკავშირმა სანქციები დაუწესა რუსეთის ერთ გენერალ-მაიორს, რომელსაც ბრალად ედება უკრაინელი სამხედროების, მათ შორის სამხედრო ტყვეების, წამება, მკვლელობა და ცხედრების შეურაცხყოფა.
სხვა ზომები
ევროკავშირი აძლიერებს ევროკავშირის კომპანიების სამართლებრივ დაცვას და წევრ სახელმწიფოებსა და ევროკავშირის სასამართლოებს უფლებას აძლევს, არ აღიარონ და არ აღასრულონ რუსეთის სასამართლოების ის გადაწყვეტილებები, რომლებიც მიღებულია ევროკავშირის სანქციების საწინააღმდეგო სამართლებრივი პროცესების ფარგლებში.
