გუშინ, ოვალურ კაბინეტში გამართული დაძაბული შეხვედრის შემდეგ, ევროპის ლიდერებმა ერთხმად გამოხატეს უკრაინისადმი მხარდაჭერა.
ევროკავშირის უმაღლესმა წარმომადგენელმა, კაია კალასმა, სოციალურ ქსელ X-ზე დაწერა: „უკრაინა ევროპაა! გვერდში ვუდგავართ უკრაინას. გავზრდით უკრაინის დახმარებას, რათა მათ შეძლონ აგრესორის წინააღმდეგ ბრძოლა. დღეს ნათელი გახდა, რომ თავისუფალ სამყაროს ახალი ლიდერი სჭირდება. ჩვენზე, ევროპელებზეა დამოკიდებული, რომ ეს გამოწვევა მივიღოთ.“
ფრიდრიხ მერცმა, გერმანიის საპარლამენტო არჩევნებში გამარჯვებული ბლოკის – ქრისტიან-დემოკრატიული კავშირი/ქრისტიან-სოციალური კავშირის (CDU/CSU) კანცლერობის კანდიდატმა, ასევე გამოხატა მხარდაჭერა: „ძვირფასო ვოლოდიმირ ზელენსკი, ჩვენ გვერდში ვუდგავართ უკრაინას კარგ და ცუდ დროს. ამ საშინელ ომში არასდროს უნდა აგვერიოს ერთმანეთში აგრესორი და მსხვერპლი.“
ევროკომისიის პრეზიდენტმა ურსულა ფონ დერ ლაიენმა, ევროპული საბჭოს პრეზიდენტმა ანტონიო კოშტამ და ევროპარლამენტის პრეზიდენტმა რობერტა მეცოლამ ერთმანეთის მსგავსი განცხადებები გაავრცელეს: „თქვენი ღირსება პატივს სცემს უკრაინელი ხალხის სიმამაცეს. იყავით ძლიერი, იყავით მამაცი, იყავით უშიშარი. არასდროს ხართ მარტო, ბატონო პრეზიდენტო ვოლოდიმირ ზელენსკი. გავაგრძელებთ თქვენთან მუშაობას სამართლიანი და ხანგრძლივი მშვიდობისთვის.“
საფრანგეთის პრეზიდენტმა ემანუელ მაკრონმა ხაზი გაუსვა საერთაშორისო მხარდაჭერის მნიშვნელობას: „არის აგრესორი – რუსეთი. არის თავდასხმის ქვეშ მყოფი ხალხი – უკრაინა. ვფიქრობ, ყველანი მართლები ვიყავით, რომ დავეხმარეთ უკრაინას და სამი წლის წინ დავასანქცირეთ რუსეთი. ამის კეთებას ვაგრძელებთ და მადლობას ვუხდით ყველას, ვინც დახმარება გაწია.“
პოლონეთის პრემიერ-მინისტრმა, დონალდ ტუსკმა, განაცხადა: „ძვირფასო ვოლოდიმირ ზელენსკი, ძვირფასო უკრაინელო მეგობრებო, თქვენ მარტონი არ ხართ.“
ბელგიის პრემიერ-მინისტრმა, ბარტ დე ვევერმა, ასევე მხარდაჭერა გამოხატა: „ჩვენ ზურგს ვუმაგრებთ უკრაინასა და უკრაინელ ხალხს, მათ ისტორიულ ბრძოლაში, რომ დაიცვან საკუთარი თავი რუსეთის არაპროვოცირებული აგრესიის წინააღმდეგ. მათი ბრძოლა, ჩვენი ბრძოლაა. ერთად ძლიერები ვართ!“
შვედეთის პრემიერ-მინისტრმა, ულფ კრისტერსონმა, განაცხადა: „შვედეთი უკრაინის გვერდით დგას. თქვენ იბრძვით არა მხოლოდ თქვენი, არამედ მთელი ევროპის თავისუფლებისთვის. დიდება უკრაინას!“
ევროკავშირის უმაღლესმა წარმომადგენელმა ჯოზეფ ბორელმა მწვავედ გააკრიტიკა ტრამპისა და ვიცე-პრეზიდენტ ჯეი დი ვენსის შეხვედრა ზელენსკისთან: „ტრამპმა და ვენსმა უღირსი სპექტაკლი მოაწყვეს. მრცხვენია ამ საქციელის. აშშ უკეთესს იმსახურებს. თავისუფალმა სამყარომ უნდა დაუჭიროს მხარი უკრაინას. ვიყავი და ახლაც ვარ ზელენსკის გვერდით.“
ევროპელი ლიდერები ხაზს უსვამენ, რომ უკრაინისადმი მხარდაჭერა უცვლელი რჩება და ისინი გააგრძელებენ უკრაინის დახმარებას.
