გორის სამხედრო ჰოსპიტალში საქართველოს მესამე პრეზიდენტი ოჯახის წევრებმა მოინახულეს.
შეხვედრიდან გამოსულმა ედუარდ სააკაშვილმა მედიას განუცხადა, რომ მიხეილ სააკაშვილი სუსტადაა, თუმცა მისი ფსიქოლოგიური მდგომარეობა კარგია და მას აქვს სურვილი, დაესწროს 2 დეკემბრის სასამართლო პროცესს.
„იმედი მაქვს, ამის შესაძლებლობა ექნება. სხვა პოლიტიკაზე არ გვისაუბრია, მოვინახულეთ მე და გიულიმ [ალასანია, სააკაშვილის დედა], სასიამოვნო შეხვედრა იყო. იმედიანად ვუყურებ ახლო მომავალს, ზოგადად“, – განაცხადა სააკაშვილმა.
ხვალ, 11 სთ-ზე თბილისის საქალაქო სასამართლოში სააკაშვილის მორიგი სასამართლო პროცესი გაიმართება ე.წ. პიჯაკების საქმეზე.
ამ საქმეზე მიხეილ სააკაშვილი ბრალდებულია 182-ე მუხლის მეორე ნაწილის „ა“, „დ“ ქვეპუნქტით და მესამე ნაწილის „ბ“ ქვეპუნქტით (დიდი ოდენობით გაფლანგვა, ჩადენილი წინასწარი შეთანხმებით ჯგუფის მიერ და სამსახურებრივი მდგომარეობის გამოყენებით).
სასჯელი 7-დან 11 წლამდე ვადით თავისუფლების აღკვეთას ითვალისწინებს.
