კინემატოგრაფისტებმა, რომლებიც მეორე კვირაა, კინოცენტრში მიმდინარე პროცესებს აპროტესტებენ, დღეს შეხვედრის მოთხოვნით ცენტრის დირექტორის მოვალეობის შემსრულებელს ოფიციალური განცხადებით მიმართეს. მათ საპროტესტო აქციაც დაანონსეს, რომელიც ხვალ, 20 ივნისს, 18:00 საათზე გაიმართება.
„კინემატოგრაფისტები, ერთკვირიანი „მორიგეობისა“ და ჩაკეტილ კარზე უშედეგო კაკუნის შემდეგ, უკვე ოფიციალური განცხადებით მივმართავთ საქართველოს კინემატოგრაფიის ეროვნული ცენტრის დირექტორის მოვალეობის შემსრულებელს, კობა ხუბუნაიას და ვაანონსებთ საპროტესტო აქციას“, – აცხადებენ ისინი.
მათივე თქმით, ოფიციალური განცხადებით მოითხოვენ კობა ხუბუნაიასთან შეხვედრას იმ დათქმით, რომ ის სოციალურ ქსელებში პირდაპირი ეთერით გავრცელდეს. კინემატოგრაფისტები შეხვედრას 20 ივნისს, 18:00 საათამდე დაელოდებიან.
„დირექტორის მოვალეობის შემსრულებელთან შეხვედრაზე სხვა საკითხებთან
ერთად შევეხებით ჩვენს მოთხოვნებს:1. შეჩერდეს მიმდინარე რეორგანიზაციის პროცესი.
2. კინოცენტრის დირექტორის მოვალეობის შემსრულებელი იყოს ინიციატორი იმისა, რომ კინოცენტრის დირექტორი დაინიშნოს მხოლოდ კონკურსის საფუძველზე; დაიწყოს კინოცენტრის მართვის ისეთ ფორმაზე მუშაობა, რომელიც უპირობოდ უზრუნველყოფს კინოცენტრის დემოკრატიულ, ავტონომიურ და ჰორიზონტალურ ფუნქციონირებას; მოვალეობის შემსრულებელი თავად იყოს გარანტი პროცესის საჯაროობისა, რომელიც წარიმართება სფეროს წარმომადგენლებთან ღია და მჭიდრო თანამშრომლობით“, – აცხადებენ კინემატოგრაფისტები.
