მე იმ ქვეყნის პრეზიდენტი არც ვარ და არც არასოდეს ვიქნები, რომელიც კურსს შეცვლის - ზურაბიშვილი

პუბლიკა

პარლამენტში დასრულდა  სალომე ზურაბიშვილის ყოველწლიური მოხსენება, რომელზეც პრეზიდენტმა ქვეყანაში მიმდინარე სოციალურ-ეკონომიკური, პოლიტიკური და სასამართლო სფეროში პროცესები შეაჯამა.

პრეზიდენტმა ხაზი გაუსვა იმას, რომ მაშინ, როცა საქართველოს ტერიტორიის 20% ოკუპირებულია და ქვეყანა რთულ გეოპოლიტიკურ რეგიონში მდებარეობს, დაუშვებელია, პოლიტიკურმა დაპირისპირებამ კრიზისი ან დესტაბილიზაცია გამოიწვიოს.

„ხელისუფლებასა და ოპოზიციას შორის აზრთა სხვაობა, თუნდაც, მწვავე ოპონირება ბუნებრივი მოვლენაა, მით უმეტეს – საარჩევნო პერიოდში. თუმცა, ჩვენს პირობებში, როცა ქვეყანა რთულ გეოპოლიტიკურ რეგიონში მდებარეობს, მისი ტერიტორიის 20%  ოკუპირებულია, მეტი სიფრთხილე გვმართებს.

არ უნდა დავუშვათ, რომ პოლიტიკურმა დაპირისპირებამ გამოიწვიოს კრიზისი ან დესტაბილიზაცია. ამიტომ, დაუშვებელია, ოკუპაციის თემა გახდეს პოლიტიკური სპეკულირებისა და ნიშნის მოგების საგანი, როგორც უკვე ვთქვი. ამიტომ, სრულიად მიუღებელია პირადი თუ პოლიტიკური ამბიციებისა და ინტერესების გამო ქვეყნის კურსის კითხვის ნიშნის ქვეშ დაყენება, მით უმეტეს მაშინ, როცა ასეთი უმძიმესი ბრალდება არ ეფუძნება არც ერთ ფაქტს: არც – პოლიტიკურს, არც – ეკონომიკურს, არც – სამართლებრივს. ასეთი ბრალდება ერის წარსულისა და მისი ერთსულოვანი არჩევანის შეურაცხყოფაა. პირადად მე, როგორც ქვეყნის პრეზიდენტი, არ დავუშვებ ცილისწამებას, რომელიც სწორედ საქართველოს და არა ცალკეულ პოლიტიკურ ძალას უთხრის ძირს. მე იმ ქვეყნის პრეზიდენტი არც ვარ და არც არასოდეს ვიქნები, რომელიც კურსს შეცვლის და საკუთარ არჩევანს, კონსტიტუციაში გაცხადებულ მიზანს გადაუხვევს. ამაში ყველას შეგიძლიათ, იყოთ დარწმუნებული.

ჩვენი ქვეყნის განვითარების ახალ ეტაპზე, რომელიც უნდა დაგვირგვინდეს დეოკუპაციით, სახელმწიფოს გაერთიანებითა და საქართველოს თავის ევროპულ ოჯახში ღირსეულ წევრად დაბრუნებით, ჩვენს თაობას აქვს ერთი ვალდებულება – დაძლიოს პოლარიზაცია. მხოლოდ ერთიან საზოგადოებას შეუძლია ამ გზის ბოლომდე გავლა. ეს არის ჩვენი პასუხისმგებლობა მომავლის წინაშე. ეს არის ჩვენი პასუხისმგებლობა მათ წინაშე, ვინც ამ ქვეყანას დამოუკიდებლობა მოუტანა”, – განაცხადა სალომე ზურაბიშვილმა გამოსვლის დასასრულს.

LB loan image desktop LB loan image mobile