აშშ-ის პრეზიდენტის, დონალდ ტრამპის თქმით, ქალაქში კონტროლის დასამყარებლად მზადაა, მინეაპოლისში შეიარაღებული ძალები გაგზავნოს. ტრამპმა Twitter-ზე მინეაპოლისის მერი გააკრიტიკა ქალაქში განვითარებული მოვლენების გამო და განაცხადა, რომ სამხედრო დახმარებას გუბერნატორი ნებისმიერი საჭიროებისთვის გამოიყენებს.
„არ შემიძლია, ვიდგე და ვუყურო იმას, რაც დიდ ამერიკულ ქალაქ მინეაპოლისში ხდება. მართვის უუნარობა. ან ეს ძალიან სუსტი რადიკალი მემარცხენე მერი ჯეიკობ ფრეი იმოქმედებს და დაამყარებს კონტროლს, ან გამოვგზავნი შეიარაღებულ ძალებს, რომლებიც მოთოკავენ კრიმინალებს, ჯორჯ ფლოიდის სახელს რომ შეურაცხყოფენ და მე ამას აღარ დავუშვებ.
ველაპარაკე გუბერნატორ ტიმ ვალსს და ვუთხარი, რომ შეიარაღებული ძალები მას ყველაფერში დაეხმარებიან. სირთულეებს გადავლახავთ და კონტროლს დავამყარებთ, თუმცა იწყება ძარცვა და იწყება სროლაც“, – წერს ტრამპი Twitter-ზე.
….These THUGS are dishonoring the memory of George Floyd, and I won’t let that happen. Just spoke to Governor Tim Walz and told him that the Military is with him all the way. Any difficulty and we will assume control but, when the looting starts, the shooting starts. Thank you!
— Donald J. Trump (@realDonaldTrump) May 29, 2020
მინესოტის შტატში, ქალაქ მინეაპოლისში პოლიციელებსა და მომიტინგეებს შორის შეტაკებები ორი დღეზე მეტია გრძელდება. საპროტესტო ტალღა მას შემდეგ დაიწყო, რაც მოქალაქის დაკავებისას პოლიციელის მხრიდან ძალადობის შემდეგ, უიარაღო მოქალაქე დაიღუპა. დაკავების კადრებში ჩანს, როგორ ყვირის ქუჩაში პოლიციის მიერ ძირს დაგდებული შავკანიანი კაცი – „ვერ ვსუნთქავ“, კეფაზე კი თეთრკანიანი პოლიციელი რამდენიმე წუთის განმავლობაში მუხლით აწვება.
