მოსამართლემ, ნინო ენუქიძემ, ვაჟა გაფრინდაშვილი 500 ლარით დააჯარიმა.
მას 27 დეკემბრის საპროტესტო აქციაზე გზის გადაკეტვას – ადმინისტრაციულ სამართალდარღვევათა კოდექსის 174 პრიმა მუხლის მე-4 ნაწილის დარღვევას ედავებიან.
თავად გაფრინდაშვილის თქმით, იმ დროს, როდესაც, შსს-ის მტკიცებით, მან გზა უკანონოდ გადაკეტა, „მაკდონალდსში“ იყო და აქციაზე საერთოდ არ ყოფილა.
მისივე თქმით, შსს-ის მიერ მტკიცებულებად მოტანილ ვიდეოში გაფრინდაშვილი 20:37 წუთზეა გადაღებული, სამართალდარღვევის ოქმი კი 20:17 წუთზეა შედგენილი – ამ დროს ის აქციაზე არ ყოფილა.
მანამდე გაფრინდაშვილმა მოსამართლის აცილებაც მოითხოვა, ვინაიდან ნინო ენუქიძე ბალტიისპირეთის ქვეყნების მიერ არის სანქცირებული და, ამასთანავე, გაფრინდაშვილის თქმით, ენუქიძეს „ქართული ოცნების“ სასარგებლო გადაწყვეტილებების მიღების 100%-იანი სტატისტიკა აქვს.
მოსამართლემ გაფრინდაშვილის ეს მოთხოვნა არ დააკმაყოფილა.
