„ლიეტუვა მტკიცედ უჭერს მხარს საქართველოს ტერიტორიულ მთლიანობასა და სუვერენიტეტს“, – ლიეტუვას საგარეო საქმეთა სამინისტრომ ამის შესახებ twitter-ზე დაწერა.
უწყების განცხადებით, 14 წლის წინ დაწყებული პუტინის აგრესია მსოფლიოს მაშინვე უნდა შეეჩერებინა და ახლა ეს უნდა შეჩერდეს უკრაინაში.
„14 წლის წინ რუსეთი შეიჭრა საქართველოში. აგრესიამ გამოავლინა განახლებული და მუდმივად გაფართოებადი რუსული რევანშიზმი. მსოფლიოს უნდა შეეჩერებინა პუტინი მაშინ, გაკვეთილი ნასწავლია. ახლა რუსეთი უნდა შეჩერდეს უკრაინაში. საკმარისია“, – ნათქვამია განცხადებაში.
🇱🇹stands in firm support of 🇬🇪 territorial integrity and sovereignty. 14y ago #Russia invaded #Georgia. The aggression showed renewed & ever expanding 🇷🇺revanchism. The world must have stopped Putin then. Lessons weren’t learnt.🇷🇺must be stopped in #Ukraine now. Enough is enough.
— Lithuania MFA | #StandWithUkraine (@LithuaniaMFA) August 7, 2022
დღეს 14 წელი გავიდა 2008 წლის რუსეთ-საქართველოს ომიდან. 2008 წლის 7 აგვისტოს რუსეთმა დაიწყო სამხედრო აგრესია, რასაც ასეულობით ადამიანის მსხვერპლი და რუსეთის მიერ საქართველოს ორი რეგიონის ოკუპაცია მოჰყვა.
2021 წლის იანვარში ადამიანის უფლებათა ევროპულმა სასამართლომ საქართველოს სარჩელი რუსეთის წინააღმდეგ, რომელიც 2008 წლის ომს უკავშირდება დააკმაყოფილა. სტრასბურგის სასამართლომ რუსეთის მიერ ადამიანის უფლებათა კონვენციის დარღვევა თითქმის ყველა ძირითად მუხლში ცნო.
სასამართლომ წარდგენილი 8 მუხლიდან რუსეთს დარღვევა 6 მუხლში – სიცოცხლის უფლების, წამებისა და არაადამიანური მოპყრობის აკრძალვის, პირადი ან ოჯახური ცხოვრების თავისუფლების პატივისცემისა და საკუთრების უფლებაში დაადგინა. ასევე დაადგინა გადაადგილების თავისუფლების, თავისუფლებისა და უსაფრთხოების უფლების დარღვევაც.
