„მწერლობის მოთვინიერება ვერ შედგა“ - ქართული პროგრამა და გზავნილები ფრანკფურტიდან

17 ოქტომბერი, 2023

პუბლიკა 11:01, 17 ოქტომბერი, 2023

17 ოქტომბერი, 2023

„მე ვარ ქართველი, და მაშასადამე ვარ ევროპელი“, „ხელოვნება ცოცხალი და დამოუკიდებელია“, „მწერლობის მოთვინიერება ვერ შედგა“, „გავიმარჯვებთ სახელოვნად“, – ეს არის ბოიკოტში მყოფი ქართველი გამომცემლებისა და მწერლების მთავარი გზავნილები ფრანკფურტიდან.

ფრანკფურტის წიგნის ბაზრობა ხვალ, 18 ოქტომბერს გაიხსნება.

„დაუმორჩილებელი ქართული ხასიათი“ – 2023 წლის ფრანკფურტის წიგნის ბაზრობაზე ქართველი გამომცემლობები და მწერლები ახალი, დამოუკიდებელი სტენდით და კონცეფციით წარდგებიან.

ქართველი გამომცემლების, მწერლებისა და ლიტერატურის სფეროს სხვა წარმომადგენელთა დიდი ნაწილი ბოიკოტს უცხადებს საქართველოს კულტურის, სპორტის და ახალგაზრდობის სამინისტროს.

„ამ ფონზე წელს ფრანკფურტის წიგნის ბაზრობაზე ვეღარ მოეწყობოდა საქართველოს წიგნის გამომცემელთა და გამავრცელებელთა ასოციაციისა და მწერალთა სახლის ერთობლივი ეროვნული სტენდი, თუმცა წელს საქართველო მსოფლიოს ყველაზე დიდი წიგნის ბაზრობაზე მაინც გააგრძელებს ტრადიციულ სტუმრობას და ოთხი წამყვანი გამომცემლობის – არტანუჯი, ინტელექტი, პალიტრა L, სულაკაურის გამომცემლობა და ფონდის „ღია საზოგადოება საქართველო“ თანადაფინანსებითა და ორგანიზებით იქნება წარდგენილი. საქართველოს სტენდის დიზაინზე დიზაინერებმა სოფა კინწურაშვილმა და ია მახათაძემ იმუშავეს.

ოთხი ორგანიზატორი გამომცემლობის გარდა, სტენდზე პროფესიული წრე და დამთვალიერებელი იხილავს 4 სხვა ქართულ გამომცემლობასაც, ესენია: მედუზა, ზიარი პრესი, შემეცნება და წიგნი+ერი, “- ამბობენ გამომცემლები.

ფრანკფურტის წიგნის ბაზრობის სხვადასხვა პლატფორმაზე მსოფლიო საზოგადოებას შეხვდებიან ქართველი მწერლები: ივა ფეზუაშვილი, თამთა მელაშვილი, ეკა ქევანიშვილი და აბო იაშაღაშვილი.

ფრანკფურტის წიგნის ბაზრობაში ქართველი გამომცემლები 1990-იანი წლებიდან ყოველწლიურად მონაწილეობენ, ამყარებენ საქმიან ურთიერთობას უცხოელ გამომცემლებთან, ყიდულობენ და ყიდიან წიგნების საავტორო უფლებებს. თავდაპირველად სტენდის და გამომცემლობების მხარდამჭერი ფონდ „ღია საზოგადოების“ ბუდაპეშტის ოფისი იყო. 2007 წლიდან კი, უკვე კულტურის სამინისტრო აფინანსებდა ფრანკფურტის წიგნის ბაზრობაზე საქართველოს ეროვნულ სტენდს.

წელს სტენდის მონაწილე გამომცემლები და ავტორები კიდევ ერთხელ მკაფიოდ გამოხატავენ ქართული საზოგადოების მისწრაფებას ევროინტეგრაციისკენ, ვინაიდან მათ სჯერათ, რომ ქართული ლიტერატურა ევროპული კულტურის განუყოფელი ნაწილია.