მედიაზე მომუშავე საერთაშორისო ორგანიზაცია „რეპორტიორები საზღვრებს გარეშე“ თბილისში დღეს განვითარებულ მოვლენებს ეხმაურება და გმობს მედიის წარმომადგენლებზე თავდასხმას.
„ათობით ჟურნალისტზე განხორციელდა თავდასხმა ამ დილით, მას შემდეგ, რაც თბილისი პრაიდის მოწინააღმდეგე ულტრა-მემარჯვენე დემონსტრანტები დედაქალაქის ცენტრში გამოვიდნენ. „რეპორტიორები საზღვრებს გარეშე“ გმობს ამ მასობრივ შეტევას და ხელისუფლებას მოუწოდებს, დაგმოს ყველა ეს თავდასხმა, ნათელი მოჰფინოს მათ“, – აღნიშნავენ ორგანიზაციაში.
დღეს, „ღირსების მარშის“ მოწინააღმდეგე ძალადობრივი ჯგუფები თავს დაესხნენ 40-მდე ჟურნალისტს, ოპერატორსა და ფოტოკორესპონდენტს. დღეს განვითარებულ მოვლენებს გამოეხმაურა მედიაზე მომუშავე საერთაშორისო სხვა ორგანიზაციები – „პრესის საერთაშორისო ინსტიტუტი“ (IPI) და „ჟურნალისტთა საერთაშორისო ფედერაცია“(IFJ).
