პრემიერმა Twitter-ზე ევროპული საბჭოს ნაცვლად ევროკომისია მონიშნა, მოლდოვის დროშის ნაცვლად - ანდორის

პუბლიკა

საქართველოს შესახებ ევროპული საბჭოს გადაწყვეტილებას საქართველოს პრემიერ-მინისტრი Twitter-ზე გამოეხმაურა. ირაკლი ღარიბაშვილმა თავდაპირველად ევროპული საბჭოს ნაცვლად ევროკომისია მონიშნა, მოლდოვის დროშის ნაცვლად კი ანდორის დროშა.

ირაკლი ღარიბაშვილმა ერთი და იგივე შინაარსის პოსტი საკუთარ Twitter-ზე ხელახლა რამდენიმეჯერ გამოაქვეყნა.

„ეს მართლაც ისტორიული დღეა საქართველოსთვის, რომელსაც ევროკავშირის საბჭომ მისცა ევროპული პერსპექტივა, რომ გახდეს ევროკავშირის წევრი. ჩვენ მზად ვართ განვახორციელოთ ყველა პრიორიტეტი, რათა მალე მივიღოთ კანდიდატის სტატუსი“, – წერს ირაკლი ღარიბაშვილი და კანდიდატის სტატუსის მიღებას ულოცავს უკრაინასა და მოლდოვას.

ფოტო: ოთარ კობახიძე

 

ევროკავშირის საბჭომ, რომელიც ევროკავშირის უმაღლესი პოლიტიკური ორგანოა, გაიზიარა ევროკომისიის შეფასებები უკრაინის, მოლდოვისა და საქართველოს შესახებ. შესაბამისად, ევროკავშირის საბჭომ უკრაინასა და მოლდოვას ევროკავშირის წევრი ქვეყნის კანდიდატის სტატუსი მიანიჭა, საბჭომ საქართველოს არ მიანიჭა კანდიდატის სტატუსი, თუმცა აღიარა მისი ევროპული პერსპექტივა – ინფორმაციას ევროპული საბჭოს პრეზიდენტი შარლ მიშელი ავრცელებს.

„ევროკავშირის საბჭომ გადაწყვიტა აღიაროს საქართველოს ევროპული პერსპექტივა და მზადაა კანდიდატის სტატუსი მიანიჭოს, როგორც კი დასახული პრიორიტეტები შესრულდება.  ვულოცავ ქართველ ხალხს. ეს ისტორიული მომენტია ევროკავშირი– საქართველოს ურთიერთობებში:   საქართველოს მომავალი ევროკავშირშია“, – აცხადებს მიშელი.

მისივე განცხადებით, „ევროპულმა საბჭომ მხარი დაუჭირა უკრაინისა და მოლდოვისთვის ევროკავშირის წევრობის კანდიდატის სტატუსის მინიჭებას მხარი დაუჭირა.

ისტორიული მომენტია. დღევანელ დღეს უმნიშვნელოვანესი ნაბიჯი გადაიდგა თქვენს გზაზე ევროკავშირისაკენ“, – წერს მიშელი და ამ გადაწყვეტილებას ულოცავს ვოლოდიმირ ზელენსკის, მაია სანდუს, უკრაინელ და მოლდოველ ხალხს.


უკრაინაში რუსეთის შეჭრის შემდეგ კიევში მიიღეს გადაწყვეტილება, რომ ევროკავშირის წევრობაზე განაცხადი შეეტანათ. უკრაინას, ასოცირებული ტრიოს დანარჩენი წევრებიც – მოლდოვა და საქართველოც მიყვნენ.

საქართველოს ხელისუფლებამ განცხადი ევროკავშირში 3 მარტს შეიტანა. ამის შემდეგ წევრობის მსურველ ქვეყნებს ევროკომისიისგან  გადაეცათ სპეციალური კითხვარი, რომელთა შევსებაც მაისში დასრულდა.

ევროკომისიამ კი უკრაინის, მოლდოვისა და საქართველოს შესახებ თავისი მოსაზრებები 17 ივნისს წარმოადგინა. ევროკომისიამ რეკომენდაცია გაუწია უკრაინასა და მოლდოვას, რომ თანდართული პირობებით კანდიდატის სტატუსი მიიღონ.

საქართველოს შემთხვევაში კი ევროკომისიამ მხარი დაუჭირა ქვეყნისთვის ევროპული მომავლის დადასტურებას და კანდიდატის სტატუსის მინიჭებას მოგვიანებით, თუკი ის ევროკომისიის მიერ გაწერილ რეკომენდაციებს გაითვალისწინებს.