პროკურატურის ინფორმაციით, დიდი ოდენობით თანხის მოტყუებით დაუფლების და ყალბი ოფიციალური დოკუმენტის დამზადება, გამოყენების ფაქტზე, კომპანია „როიალ ტაბ გრუპპის” დირექტორი დააკავეს. კომპანიის იურისტის მიმართ კი გამოცხადებული აქვთ ძებნა.
უწყებამ ჩატარებული გამოძიებით დაადგინა, რომ კომპანია „როიალ ტაბ გრუპპმა” ნაძალადევის გამგეობიდან საყრდენი კედლების მოწყობის სამუშაოების შესრულებისთვის ჩარიცხული სატენდერო თანხიდან 98 000 ლარი მიისაკუთრა. პროკურატურის ინფორმაციით, ბრალდებულებმა, კომპანიის დირექტორმა და იურისტმა დაამზადეს სამუშაოების შესრულების ამსახველი ყალბი მიღება-ჩაბარების აქტები და სხვა დოკუმენტები.
„პროკურატურის მიერ ჩატარებული გამოძიებით დადგინდა, რომ 2022 წელს ნაძალადევის რაიონის გამგეობასა და „როიალ ტაბ გრუპპის წარმომადგენლობას“ შორის, ელექტრონული ტენდერის შედეგის საფუძველზე, საყრდენი კედლების მოწყობის სამუშაოების შესრულებაზე 523 500 ლარის ხელშეკრულება გაფორმდა.
ხელშეკრულების შესრულების პროცესში, „როიალ ტაბ გრუპ-ის წარმომადგენლობის“ დირექტორმა და იურისტმა ხელშეკრულებით გათვალისწინებული საავანსო თანხის დაუფლება გადაწყვიტეს. ამ მიზნით, კომპანიის იურისტმა ნაძალადევის რაიონის გამგეობაში ,,ნიუ ვიჟენ დაზღვევის“ სახელით შედგენილი ყალბი განცხადება წარადგინა, რის საფუძველზეც კომპანიას სახელმწიფო ხაზინიდან ავანსი სახით – 157 000 ლარი ჩაერიცხა.
დანაშაულებრივი ჯგუფის წევრებმა, სამუშაოს მხოლოდ თანხის ნაწილი მოახმარეს, ხოლო, დარჩენილი – 98 000 ლარი მიისაკუთრეს. ბრალდებულებმა ასევე, დაამზადეს და გამგეობაში წარადგინეს 45 000 ლარის სამუშაოების შესრულების ამსახველი ყალბი მიღება-ჩაბარების აქტები და სხვა დოკუმენტაცია”, – ნათქვამია უწყების განცხადებაში.
პროკურატურის ინფორმაციით, უწყების თანამშრომლებმა კომპანიის დირექტორი სასამართლოს განჩინების საფუძველზე დააკავეს. მას ბრალი 180-ე მუხლის მეორე ნაწილის „ა“, მესამე ნაწილის „ბ“ და მეოთხე ნაწილის „ბ“ ქვეპუნქტებით და ამავე კოდექსის 362-ე მუხლის მეორე ნაწილის „ბ“ ქვეპუნქტით (ორჯერ ნასამართლევი პირის მიერ წინასწარი შეთანხმებით ჯგუფის მიერ, დიდი ოდენობით ჩადენილი თაღლითობისა და ყალბი ოფიციალური დოკუმენტის დამზადება, გამოყენების ფაქტებზე) წარუდგინეს, რაც სასჯელის სახედ და ზომად შვიდიდან ათ წლამდე თავისუფლების აღკვეთას ითვალისწინებს.
პროკურატურის შუამდგომლობის საფუძველზე ბრალდებულს აღკვეთის ღონისძიების სახით პატიმრობა შეეფარდა.
დაუსწრებლად წარედგინა ბრალდება კომპანიის იურისტს, სსკ-ის 180-ე მუხლის მეორე ნაწილის „ა“, მესამე ნაწილის „ბ“ და „გ“ ქვეპუნქტებით და ამავე კოდექსის 362-ე მუხლის მეორე ნაწილის „ბ“ ქვეპუნქტით (წინასწარი შეთანხმებით ჯგუფის მიერ, დიდი ოდენობით, არაერთგზის ჩადენილი თაღლითობისა და ყალბი ოფიციალური დოკუმენტის დამზადება, გამოყენების ფაქტებზე), რაც სასჯელის სახედ და ზომად ექვსიდან ცხრა წლამდე თავისუფლების აღკვეთას ითვალისწინებს.
