თალიბანმა დაიწყო შესვლა ავღანეთის დედაქალაქ ქაბულში, მას შემდეგ, რაც დაიკავა სხვა ქალაქები. როგორც BBC ავღანეთის შინაგან საქმეთა სამინისტროზე დაყრდნობით წერს, დაჯგუფების ნაწილი დედაქალაქში უკვე შესულია.
ავღანეთის სამმა მაღალჩინოსანმა Associated Press-ს განუცხადა, რომ დაჯგუფების წევრები შენიშნეს დედაქალაქ კალაკანის, ყარაბაღისა და ფაღმანის რაიონებში. ამ ეტაპისთვის, თალიბანი აკონტროლებს ავღანეთის 34 პროვინციიდან 24-ს.
BBC იუწყება, რომ ხალხი დედაქალაქს მანქანებით ტოვებს, რამაც გზებზე დიდი საცობები გამოიწვია.
მანამდე, 13 აგვისტოს, თალიბანმა სწრაფად დაიკავა სხვა მნიშვნელოვანი ქალაქებიც. დაიპყრო ქვეყნის სიდიდით მეორე და მესამე ქალაქი – ყანდაარი და ჰერატი. ასევე, ქალაქი მაზარ-ი-შარიფი, რომელიც თალიბანისადმი წინააღმდეგობის ცენტრად მიიჩნეოდა და ბოლო საკვანძო წერტილი იყო ავღანეთის ჩრდილოეთში, რომელსაც მთავრობა ჯერაც აკონტროლებდა.
თალიბანის ერთ-ერთმა წარმომადგენელმა სუჰაილ შაჰინმა Al-Jazeera-ს განუცხადა, რომ მეამბოხეები „ქაბულის მშვიდობიან გადაბარებას ელოდებიან“. ვრცელდება ინფორმაციაც, რომ თალიბანის მომლაპარაკებლები პრეზიდენტის სასახლისკენ გაემართნენ, ძალაუფლების გადაცემის განსახილველად, თუმცა უცნობია მოლაპარაკების კონკრეტული დეტალები.
თალიბანი განსაკუთრებით გააქტიურდა მას შემდეგ, რაც აშშ-მა და სხვა ქვეყნებმა, 20-წლიანი სამხედრო ოპერაციების შემდეგ, ქვეყნის დატოვების გადაწყვეტილება მიიღეს.
2021 წლის 14 აპრილს აშშ-ის პრეზიდენტმა, ჯო ბაიდენმა ავღანეთიდან ამერიკული ჯარების გაყვანის შესახებ განაცხადა. პირველ მაისს ოფიციალურმა ვაშინგტონმა ავღანეთიდან ჯარის გაყვანა ოფიციალურად დაიწყო. ამერიკელი ჯარისკაცები ქვეყანას სრულად 31 აგვისტოს დატოვებენ.
