კონსტიტუციონალისტი გიორგი მშვენიერაძე წერს, რომ თბილისის საქალაქო სასამართლომ განცხადება კონსტიტუციის არარსებული მუხლის ციტირებით გაავრცელა. ხოლო მას შემდეგ, რაც შეცდომაზე მიუთითეს, მუხლის დასახელება განცხადებიდან ამოიღეს.
„ამათ ვინმემ აუხსენით, რომ დეკემბერში 1 წელი შესრულდება, რაც კონსტიტუციის ახალი რედაქცია მოქმედებს და 84-ე მუხლი საერთოდ აღარ აქვს“, – წერდა მშვენიერაძე Facebook-ზე.
„საქართველოს კონსტიტუციის 84-ე მუხლის თანახმად, მოსამართლე თავის საქმიანობაში დამოუკიდებელია და ემორჩილება მხოლოდ კონსტიტუციას და კანონს“, – ასეთი ფორმულირება ჰქონდა მშვენიერაძის მიხედვით თავდაპირველ ტექსტს.
მოგვიანებით, სავარაუდოდ, თბილისის საქალაქო სასამართლოს ვებგვერდზე განცხადების ტექსტი ჩაასწორეს. „საქართველოს კონსტიტუციის თანახმად, მოსამართლე თავის საქმიანობაში დამოუკიდებელია და ემორჩილება მხოლოდ კონსტიტუციას და კანონს“, – ასეთი ტექსტი გვხვდება ვებგვერდზე ამჟამად განთავსებულ განცხადებაში.
