ბათუმის საქალაქო სასამართლოში მზია ამაღლობელის სისხლის სამართლის საქმეზე გამოიკითხა აჭარის პოლიციის დეპარტამენტის საგამოძიებო სამმართველოს უფროსი, ბერდია ფერაძე.
მან ირაკლი დგებუაძის მოადგილე გიორგი ბჟალავასთან ერთად 12 იანვარს პირადად დააკავა მზია ამაღლობელი.
ფერაძე ერთ-ერთია იმ პოლიციელებს შორის, რომლებმაც მზია ამაღლობელის დაკავების შესახებ იდენტური ჩვენებები მისცეს.
მას კითხვები დაუსვეს როგორც ბრალდების, ისე დაცვის მხარემ და თავად მზია ამაღლობელმა.
პროკურორმა ბერდია ფერაძეს ჰკითხა, რა მდგომარეობაში იყო „დაზარალებული“ [ირაკლი დგებუაძე] მას შემდეგ, რაც მზია ამაღლობელმა მას სილა გააწნა.
„დაზარალებული [ირაკლი დგებუაძე] 10-15 წუთში ვნახე, იყო გაკვირვებული, არ იცოდა, თუ რატომ დაარტყა მას ხელი, სახეზე აღენიშნებოდა სიწითლე მარჯვენა ლოყაზე და ყურზე“, – თქვა მან.
მზია ამაღლობელის ადვოკატმა, მაია მწარიაშვილმა ფერაძეს ჰკითხა, რატომ არ შეადგინა პირადად მან დაკავების ოქმი, როცა ჟურნალისტი თავად დააკავა. ფერაძემ უპასუხა, რომ გამომძიებელს დაელოდა. მისივე თქმით, ელოდა აჭარის პოლიციის უფროსის, გრიგოლ ბესელიას მითითებებს, ვინ დაიწყებდა გამოძიებას.
მწარიაშვილმა ასევე იკითხა, რატომ არ აძლევდა ადვოკატებს მზია ამაღლობელთან შესვლის უფლებას რამდენიმე საათის განმავლობაში. ფერაძემ უპასუხა, რომ დაკავებულთან სახალხო დამცველის წარმომადგენელი დაუშვა. ადვოკატმა განმარტა, რომ ომბუდსმენის წარმომადგენელი მას ადვოკატის მაგივრობას სამართლებრივად ვერ გაუწევს.
ბერდია ფერაძე: მე ვიყავი დამკავებელი, უშუალო შემსწრე. დანაყოფი, რომელიც გამოიძიებდა საქმეს – ჩათვლიდა საჭიროდ, მე გამოვიძიებდი, ჩათვლიდა საჭიროდ, სხვა.
მაია მწარიაშვილი: მაგრამ მითითებები მისცა სხვას“.
პროკურორმა ადვოკატის კითხვები გააპროტესტა. მისი თქმით, ამ კითხვებს საქმესთან კავშირი არ აქვს და მხოლოდ „მსგავსი ფრაზებისთვის“ და „საზოგადოებისთვის წარმოდგენების შესაქმნელად ისმება“.
მზია ამაღლობელმა კი პოლიციელს ჰკითხა, იყო თუ არა ის განყოფილებაში იმ დროს, როცა მას ირაკლი დგებუაძე სიტყვიერ შეურაცხყოფას აყენებდა და უზღუდავდა საპირფარეშოს გამოყენებას, არ აწვდიდა წყალს.
ფერაძემ უთხრა, რომ იმ ოთახის მეზობლად, სადაც მზია იყო მოთავსებული, თუმცა, ხმაური ან გინება არ გაუგია.
მზია ამაღლობელი: თქვენ არ გინახავთ ე.წ. დაზარალებული ჩემთან შემოსული გინებით?
ბერდია ფერაძე: დაზარალებული გინებით თქვენთან არ შემოსულა და არც მინახავს;
მზია ამაღლობელი: შესაძლებელია, ეს ყოფილიყო მაშინ, როცა თქვენ არ იყავით იმ ოთახში?
ბერდია ფერაძე: იმ ოთახში თუ არ ვიყავი, ვიყავი ოთახში მოპირდაპირე მხარეს, შესაბამისად, დავინახავდი, რომ შემოსულიყო.
მზია ამაღლობელი: და თქვენ არც ხმაური გესმოდათ იმ ოთახიდან, სადაც მე ვიყავი, როცა მაგინებდა, მაფურთხებდა?
ბერდია ფერაძე: არაფერი არ გამიგია, მსგავსი ფაქტი არ ყოფილა.
მზია ამაღლობელი: წყალი რომ ამიკრძალა..
ბერდია ფერაძე: წყალიც გქონდათ და საპირფარეშოში გასვლის საშუალებაც, ქალბატონო მზია. ჩემმა გამომძიებელმა პირადად მოგაწოდათ წყალი.
მზია ამაღლობელი: შეგიძლიათ, მითხრათ, რამდენი ხნის შემდეგ?
ბერდია ფერაძე: პირველ სართულზეც, როცა მოითხოვეთ და მესამე სართულზეც. ყველგან გქონდათ წყალი და საპირფარეშოს გამოყენების საშუალება.
მზია ამაღლობელი: ტყუილია ეს ყველაფერი.
მზია ამაღლობელი: რა ვითარებაში განმიმარტეთ ჩემი უფლებები?
ბერდია ფერაძე: ოთახში შეყვანის შემდეგ პირველ სართულზე, როცა დაბრძანდით სავარძელზე.
მზია ამაღლობელი: ესეც ტყუილია.
„ბათუმელები/ნეტგაზეთის” დამფუძნებელს მზია ამაღლობელს ბათუმის პოლიციის უფროსის, ირაკლი დგებუაძისთვის სახეში სილის გაწვნის გამო პოლიციელზე თავდასხმას ედავებიან. მას 4-დან 7 წლამდე პატიმრობა ემუქრება.
11 იანვარს დაწყებულ აქციაზე მზია ამაღლობელი ორჯერ დააკავეს – თავდაპირველად 11 იანვრის ღამეს, კედელზე პლაკატის გაკვრის გამო. მოგვიანებით ის გაათავისუფლეს. გათავისუფლებიდან მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს, უკვე 12 იანვარს, 2 სხვა პირთან ერთად.
13 იანვარს „ბათუმელებმა/ნეტგაზეთმა” გაავრცელა ვიდეო და ინფორმაცია, რომ მათ დირექტორს, მზია ამაღლობელს ბათუმის პოლიციის უფროსი ირაკლი დგებუაძე აგინებს და ვიდეოში ისმის მისი სიტყვები: „სისხლით… ბო*იშვილი ვიყო, სისხლით დავიჭერ, ამას მოვუ**ნავ დედის მუ*ელს“.
15 იანვარს საიას თავმჯდომარემ, ნონა ქურდოვანიძემ მზია ამაღლობელთან რუსთავის ციხეში ვიზიტის შემდეგ ისაუბრა ირაკლი დგებუაძის მხრიდან არასათანადო მოპყრობაზე.
ქურდოვანიძემ აღნიშნა, რომ დგებუაძემ ამაღლობელს სახეში შეაფურთხა, ასევე, მისი ბრძანების შესაბამისად, მზია ამაღლობელს არ ეძლეოდა გარკვეული დროის განმავლობაში წყლის დალევის, ასევე, საპირფარეშოთი სარგებლობის შესაძლებლობა.
მზია ამაღლობელი უსამართლობას 38 დღის განმავლობაში შიმშილობით აპროტესტებდა.
