„სინოვაკის“ 100 00 დოზა, რომელიც არის ჩინეთის მთავრობის დონაცია საქართველოს მიმართ, დღეს ჩამოვა ქვეყანაში, – ამის შესახებ საქართველოს ჯანდაცვის მინისტრის მოადგილემ, თამარ გაბუნიამ სამინისტროში კლინიკური საბჭოს სხდომის დასრულების შემდეგ გამართულ ბრიფინგზე განაცხადა.
გაბუნიას თქმით, „სინოვაკის“ ვაქცინის გამოყენების თაობაზე ვაქცინაციის საბჭო დამატებით იმსჯელებს.
„ჯანმრთელობის მსოფლიო ორგანიზაციის ავტორიზაციის პირობით გვაქვს „სინოვაკის“ გამოყენება. ჯერჯერობით ასეთი გადაწყვეტილებაა მიღებული ვაქცინაციის საბჭოს მიერ. ჩვენ ვფიქრობთ, რომ მაისის დასაწყისი აქვს ჯანმრთელობის მსოფლიო ორგანიზაციას დაანონსებული, როგორც „სინოვაკის“ ავტორიზაციის თარიღი. ამდენად, ამას დაველოდებით. თუ გადავადდა და დაყოვნდა, ეპიდემიოლოგიური რისკების გათვალისწინებით საბჭო დამატებით იმსჯელებს „სინოვაკის“ გამოყენების პირობებზე“, – განაცხადა თამარ გაბუნიამ.
მისი თქმით, „სინოვაკის“ ვაქცინას უკვე ფართოდ იყენებს რეგიონის რამდენიმე ქვეყანა და მას კეთილსაიმედო შედეგები აქვს.
„სინოვაკს“ დღეს ფართოდ იყენებს თურქეთი, ჩვენს რეგიონში აზერბაიჯანში არის „სინოვაკი“, უკრაინაშიც. „სინოვაკის“ შედეგები არის საკმაოდ კეთილსაიმედო. ეფექტურობის თვალსაზრისითაც არის კარგი მონაცემები და რაც მთავრია, სიკვდილობის მაჩვენებლებს და მძიმე შემთხვევების განვითარების მაჩვენებლებს მნიშვნელოვნად ამცირებს“, – აღნიშნა თამარ გაბუნიამ.
