სოციალურად დაუცველი ოჯახების გადამოწმება 1 აპრილამდე შეჩერდა - სამინისტრო

პუბლიკა

სოციალურად დაუცველი ოჯახების მონაცემთა ბაზაში რეგისტრირებული ოჯახების სოციალურ-ეკონომიკური მდგომარეობის ხელახალი გადამოწმება 2022 წლის 1 აპრილამდე შეჩერდა, – ინფორმაციას ამის შესახებ ჯანდაცვის სამინისტრო ავრცელებს.

როგორც უწყება ოფიციალურად განმარტავს, აღნიშნულის შესახებ გადაწყვეტილება ეპიდემიოლოგიური მდგომარეობის გათვალისწინებით მიიღეს.

„მოგეხსენაბთ, COVID-19-ის პანდემიის პერიოდში ,,იზოლაციისა და კარანტინის წესების დამტკიცების შესახებ” საქართველოს მთავრობის 2020 წლის 23 მაისის N322 დადგენილებით დამტკიცებული წესით სოციალური დაცვის მიმართულებით შემოღებული იყო სოციალური დახმარებების ადმინისტრირების დროებითი ღონისძიებები, რომლის ფარგლებში არ ხორციელდებოდა  მონაცემთა ბაზაში რეგისტრირებული ოჯახების სოციალურ-ეკონომიკური მდგომარეობის ხელახალი გადამოწმება.

მიუხედავად სარეიტინგო ქულის ოდენობისა, საარსებო შემწეობის მიმღებ ოჯახებს უწყვეტად უგრძელდებოდათ დახმარების გაცემა. ცვლილების შესაბამისად, საარსებო შემწეობის მიმღები ოჯახების სოციალურ-ეკონომიკური მდგომარეობის გადამოწმება კვლავ არ განხორციელდება, გარდა იმ შემთხვევებისა, როდესაც აღნიშნული მოთხოვნილია უშუალოდ ოჯახის მიერ”, – ნათქვამია განცხადებაში.


მეორე დღეა საქართველოს მასშტაბით სოცსააგენტოს თანამშრომლები, მათ შორის, სოცაგენტები გაიფიცნენ. ისინი შრომის ანაზღაურების გაზრდას მოითხოვენ.