სომხური მედიაგამოცემების ნაწილზე კიბერშეტევა მოხდა

პუბლიკა

სომხური მედიაგამოცემების ნაწილზე კიბერშეტევა მიიტანეს. რამდენმე წუთის განმავლობაში ონლაინგამოცემების ვებგვერდები გათიშული იყო, ერთ-ერთი გამოცემის News.am-ის მეშვეობით კი ცრუ ინფორმაცია გავრცელდა, თითქოს ფაშინიანი მოუწოდებდა ყარაბაღის მოსახლეობას დაეტოვებინათ სახლები და თავი სომხეთისთვის შეეფარებინათ, შემდეგ კი დაიდო აზერბაიჯანის პრეზიდენტის ვიდეო, სადაც ის ამბობს, რომ ყარაბაღი აზერბაიჯანია.

დღეს დროებით გიათიშა აზერბაიჯანის ვებგვერდების ნაწილიც, მათ შორის თავდაცვის სამინისტროს ვებგვერდიც. ასევე მოსახლეობას შეეზღუდა ინტერნეტზე წვდომა, თუმცა რამდენიმე საათში ინტერნეტი შეუფერხებლად ამუშავდა.


აზერბაიჯანის თავდაცვის სამინისტროს პრესსპიკერის თქმით, დღევანდელი სამხედრო მოქმედებების შედეგად მათ დაიკავეს 6 სოფელი, გაანადგურეს მოწინააღმდეგის პოზიციები და აიღეს რამდენიმე სტრატეგიული სიმაღლე. მოგვიანებით გავრცელდა ინფორმაცია, რომ აზერბაიჯანმა კიდევ ერთი სოფლის დაკავება მოახერხა. მთიანი ყარაბაღის დე ფაქტო ხელისუფლება ამ ინფორმაციას უარყოფს.

აზერბაიჯანსა და სომხეთს შორის დაწყებული დაპირისპირების შედეგ აზერბაიჯანული მედიის ინფორმაციით, სატელეფონო საუბარი გაიმართა ილჰამ ალიევსა და თურქეთის პრეზიდენტს, რეჯეპ ტაიპ ერდოღანს შორის. ასევე სატელეფონო საუბარი გამართეს აზერბაიჯანისა და თურქეთის თავდაცვის მინისტრებმა.

ხოლო რუსული მედიის ინფორმაციით, დღეს სატელეფონო საუბარი შედგა რუსეთისა და სომხეთის საგარეო საქმეთა მინისტრებს შორის. მოგვიანებით კი სერგეი ლავროვი თურქეთის საგარეო საქმეთა მინისტრს ელაპარაკა.

მთიან ყარაბაღში სამხედრო დაპირისპირება დღეს დილით დაიწყო. სომხეთის ხელისუფლება ამტკიცებს, რომ იერიში პირველად, 07:10 საატძე აზერბაიჯანის სამხედრო ძალებმა მიიტანეს. აზერბაიჯანში კი აცხადებენ, რომ დაპირისპირება სომხეთის მეირ მოწყობილი პროვოკაციით დაიწყო და აზერბაიჯანელები კონტრშეტევაზე გადავიდნენ.

დღეს დილას დაწყებულ სამხედრო დაპირისპირებას მოჰყვა მსხვერპლი. სომხეთის თავდაცვის სამინისტრო აცხადებს, რომ მათ ჩამოაგდეს რამდენიმე უპილოტო საფრენი აპარატი და სამხედრო ვერტმფრენი, ასევე გაანადგურეს რამდენიმე ტანკი. უწყება 2 აზერბაიჯანული ტანკის აფეთქების ვიდეოსაც ავრცელებს. აზერბაიჯანის ხელისუფლება კი აცხადებს, რომ მათაც არაერთი სომხური სამხედრო ტექნიკა გაანადგურეს.