შიდსის ცენტრის ინფორმაციით, „საქართველოს თეატრალურმა საზოგადოებამ” მედიკოსები დააჯილდოვა.
როგორც ცენტრის მიერ გავრცელებულ ინფორმაციაშია აღნიშნული, 14 იანვარს ქართული თეატრის დღე აღინიშნება, თუმცა Covid-19-ის პანდემიის გამო, ისევე როგორც მსოფლიოში, საქართველოშიც სახელოვნებო დარგი გაჩერდა და განსაკუთრებული რაიმე მოვლენა არაფერი მომხდარა.
„თუმცა, საქართველოს თეატრალურმა საზოგადოებამ დაჯილდოების ტრადიცია არ დაარღვია, ხელოვანების ნაცვლად, Covid-19-ის ბრძოლის წინა ხაზზე მებრძოლ მედიკოსებს სახელობითი პრემიები გადასცა”, – ნათქვამია განცხადებაში.
ეს ჯილდოებია:
► „აკადემიკოს ვახტანგ ბოჭორიშვილის სახელობითი პრიზი (ვ.ბოჭორიშვილი მედიცინამდე თელავის თეატრის რეჟისორი და მსახიობი იყო) ამირან გამყრელიძეს და თენგიზ ცერცვაძეს გადაეცა.
► ცნობილი კინომსახიობის ლიანა ასათიანის (ქალბატონი ლიანა პროფესიით ექიმი იყო) სახელობის პრიზები მარინა ეზუგბაიას და მარინა ენდელაძეს.
► ექიმის, თბილისის კოლორიტისა და არაერთი დასამახსოვრებელი კინოროლის შემსრულებლის, თემიკო ჩირგაძის სახელობითი პრიზები პაატა იმნაძეს და ლევან რატიანს”.
