თურქეთი ფინეთისა და შვედეთის NATO-ს ალიანსში გაწევრებას მხარს დაუჭერს. ინფორმაციას BBC ავრცელებს.
როგორც BBC წერს, თურქეთის, ფინეთისა და შვედეთის საგარეო საქმეთა მინისტრებმა ხელი მოაწერეს მემორანდუმს, რომელიც ადასტურებს, რომ მადრიდის NATO-ს სამიტზე თურქეთი მხარს დაუჭერს ალიანსში ფინეთისა და შვედეთის გაწევრებას.
აქამდე თურქეთი შვედეთისა და ფინეთის სახელმწიფოების NATO-ში გაწევრებას ეწინააღმდეგებოდა იმ მოტივით, რომ ისინი თავშესაფარს აძლევდნენ ქურთ აქტივისტებს, რომლებსაც ანკარა ტერორისტებად თვლიდა.
NATO-ს გენერალური მდივანი იენს სტოლტენბერგი მიესალმა შეთანხმებას, რამაც მწვანე შუქი აუნთო ფინეთისა და შვედეთს დასავლური ქვეყნების სამხედრო ალიანსში გაწევრებას.
ფინეთის პრეზიდენტმა საული ნიინისტემ განაცხადა, რომ „ ფინეთი, როგორც NATO-ს წევრი, სრულად დაიცავს NATO-ს კონტრტერორისტულ პოლიტიკას“.
BBC საინფორმაციო სააგენტო AFP-ზე დაყრდნობით წერს, რომ თურქეთის პრეზიდენტმა „მიიღო ის, რაც სურდა“.
